Италия «А серия»сидаги «Аталанта» билан бўлган баҳсдан сўнг  Роналду маҳаллий «Cачо Меркато» нашрига кичик, аммо ўта қизиқарли интервью берди. Биз эса сайтимиз муштарийлари учун ушбу интервьюни таржима қилдик.

“Бу ажойиб мавсум бўлди. Бир-биридан қизиқ  ва шиддатли футбол учрашувларини бизга тақдим этган муросасиз мавсум ўз якунига етганидан бироз хафа ҳам бўлдим. «Ювентус» клуби мен учун жуда катта тажриба мактаби бўлди. Бу ерда жуда кўп нарсаларни ўргандим. Шу жумладан  янги чемпионатга кўникиб кетишни ҳам. Бу мен учун футболдаги энг муҳим омиллардан бири! Бу мавсумдаги баъзи ўйинларни жуда юқори темпда ўтказдик. Баъзиларини эса жуда ҳунук якунладик. Шундай бўлсада, Турин менинг қалбимда қолади. Сабаби, бу ерда ажойиб жамоадошлар, меҳрибон клуб раҳбарлари ва ҳеч кимга ўхшамайдиган футбол мухлислари бор. Айниқса, «Атлетико»га қарши кечган  жавоб учрашувидаги фантастик ўйинни ҳеч қачон ёдимдан чиқармасам керак. Мен Италия чемпиони ва «Супер Кубоги» соҳиби бўлдим. Албатта бу билан тўхтаб қолмоқчимасман. Айни дақиқаларда мен билан янги марраларни забт этишда елкама-елка турган дўстларимга ўз миннатдорчилигимни билдираман. Шу жойда бу тарихни якунласам, адолатдан бўлади. Энди навбат янги тарих яратишга!”

Айнан ушбу интервьюдан сўнг Роналду ўз Твиттерида очиқчасига Мадридга қайтишига шаъма қилган ҳолда  шаҳар кўчаларининг суратини  жойлаштирганча расмга  «Уйга қайтадиган вақт бўлди» дея изоҳ қолдирди.