Хабарингиз бор, жорий йилнинг май ойи республикамизда “Спорт ойлиги” деб эълон қилиниб, ойлик доирасида аҳолининг кенг қатламлари ўртасида жисмоний тарбия ва спортни оммалаштиришга қаратилган кўплаб тадбирлар ўтказилмоқда.

Шундай тадбирлардан бири сифатида ўтган дам олиш кунларида Жисмоний тарбия ва спорт вазирлиги марказий аппарати ҳамда вазирлик тизимидаги республика ташкилотлари ходимлари иштирокида спортнинг мини-футбол, стол тенниси ва сузиш турлари бўйича мусобақа ўтказилди.
 

Қизғин баҳсларга бой ўтган футбол мусобақасида биринчи ўринни вазирликнинг “Ёшлик” жамоаси қўлга киритди. Иккинчи ўринни вазирлик ходимларидан таркиб топган “Спорт” жамоаси қўлга киритган бўлса, учинчи ўрин Спорт якка курашлари бўйича Республика олий спорт маҳорати мактабига жамоасига насиб этди.

Стол тенниси бўйича баҳсларда эса Сув спорт турлари бўйича Республика олий спорт маҳорати услубчиси Фозилбек Хонхўжаев биринчи ўринни эгаллади.Иккинчи ва учинчи ўринларга мос равишда вазирликнинг Миллий терма жамоаларни саралаш (селекция), шакллантириш ва тайёрлаш бошқармаси бош мутахассиси Жамшидбек Хасанов ва Ахборот-таҳлил бошқармаси бошлиғи Исомиддин Пўлатов сазовор бўлишди.

Республика ихтисослаштирилган олимпия захиралари мактаб-интернати сузиш ҳавзасида ўтказилган 50 метрга сузиш мусобақасида вазирлик бухгалтерияси бош мутахассиси Ғайбуллаев Элдор 38 сония натижа кўрсатиб маррага биринчи бўлиб етиб келди. Иккинчи ўринни Ахборот-таҳлил бошқармаси бошлиғи ўринбосари Ойбекжон Рахманов қўлга киритган бўлса, учинчи ўрин Фан, спорт ва таълим муассасаларини илмий методик таъминлаш бошқармаси бошлиғи ўринбосари Умид Жўраевга насиб этди.