Европа лигасининг ушбу мавсумдаги ғолиби номи аниқ бўлди. Бокудаги "Олимпия" стадионида бўлиб ўтган финал баҳсида "Челси" ҳамшаҳри "Арсенал"ни йирик ҳисобда мағлуб этди.

Томонлар ўйинни эҳтиёткорлик билан бошлашди. Биринчи бўлимнинг дастлабки ярмида вазиятлар яратиш бўйича устунлик "канонирлар" томонида бўлди. Жумладан, Обамеянг энг 14 метрдан дарвоза томон аниқ зарба бера олмаган бўлса, Жаканинг олис масофадан йўллаган зарбаси натижасида тўп тўсинни силаб ўтиб кетди.

Таймнинг иккинчи ярмига келиб ташаббус Сарри шогирдлари томонига ўта бошлади. Иккинчи бўлимда эса улар вазиятлардан фойдалана бошлашди. Бунда "Арсенал" ёш ҳимоячиларидан бир ҳам "ёрдам" қўлини чўзиб турди. Баҳснинг 65-дақиқасига келиб "Челси" рақиб дарвозасини 3 марта ишғол қилди. Дастлаб Жиру бош билан дарвозани ишғол қилган бўлса, кейинчалик Азарнинг узатмасини Педро голга айлантирди. Эденнинг ўзи эса пенальтидан самарали фойдаланиб, ҳисобни йирик кўринишга келтирди.

Алекс Ивоби захирадан тушдию, чиройли гол билан ҳисобни қисқартирди. Аммо яна бир хато туфайли Азар рақиб жамоани жазолади — 4:1.

Ўйиннинг сўнгги дақиқаларида "Арсенал" нақ 3 марта голга тортадиган вазият яратди. Ляказетт икки марта яккама-якка вазиятдан фойдалана олмади. Бир марта Кепа Аррисабалага қайтарган бўлса, бир марта унинг зарбасига аниқлик етишмади.

Шу тариқа, "Челси" мавсумни соврин билан якунлаган бўлса, "Арсенал" Европа чемпионлар лигаси йўлланмасидан ҳам қуруқ қолди.

Европа лигаси, финал
Челси Англия – Арсенал Англия 4:1 (0:0, 4:1)
Голлар: 1:0 – 49 Жиру, 2:0 – 60 Педро, 3:0 – 65, пенальти Азар, 3:1 – 69 Ивоби, 4:1 – 72 Азар.
Челси – Аррисабалага, Кристенсен, Эмерсон, Аспиликуэта, Давид Луиз, Ковачич (Баркли, 76), Жоржиньо, Педро (Виллиан, 71), Канте, Азар (Дзаппакоста, 89), Жиру.
Арсенал – Чех, Косьельни, Монреаль (Гендузи, 66), Колашинац, Папастатопулос, Торрейра (Ивоби, 67), Мэйтленд-Найлз, Жака, Ўзил (Уиллок, 77), Обамеянг, Ляказетт.
Огоҳлантиришлар: Педро (56), Кристенсен (68).