Айни кунларда Япония пойтахти Токио шаҳрида замонавий бешкураш бўйича Жаҳон кубогининг финал босқичи бўлиб ўтмоқда. Эътиборлиси, мусобақага ташриф буюрган Ўзбекистон замонавий бешкураш федерацияси (ЎЗБФ) раиси Баҳромжон Газиев ушбу спорт турини юртимизда янада ривожлантириш бўйича яна бир янги қадам ташлади.
Б.Газиев мусобақа доирасида Осиё замонавий бешкураш федерацияси раиси Сангву Парк билан учрашиб, ушбу спорт турини юртимизда янада ривожлантириш борасида меморандум имзолади.
Мазкур жараёнда Япония замонавий бешкураш федерацияси раҳбарияти ҳам иштирок этиб, меморандум имзоланганидан сўнг томонлар спортнинг қитъамиздаги ривожи бўйича суҳбат олиб боришди.
Суҳбатда ушбу спорт тури бўйича Европа спортчиларига янада кучли рақобат туғдира оладиган Осиё вакилларини тайёрлаш, терма жамоалар ўртасида ҳамкорликдаги ўқув-машғулот йиинларини олиб бориш борасида оғзаки келишувларга эришилди.
