Ўзбекистон Лига кубогининг 2-туридан ўрин олган “Қўқон-1912” – “Локомотив” учрашуви ўз ниҳоясига етди. Қўқонда бўлиб ўтган ўйинда мезбонларнинг қўли баланд келди.
Учрашувни мезбонлар фаол тарзда бошлашди. 10-дақиқада Муҳаммаданас Ҳасанов бир неча рақибларни ортда қолдириб, рақиб дарвозаси томон яқинлашди. Бироқ уни рақиблар қўполлик билан тўхтатиб қолишди.
13-дақиқада “Қўқон-1912” футболчилари ҳисобни очишга муваффақ бўлишди. Бурчакдан оширилган тўпни Жавоҳир Эсонқулов боши билан рақиб дарвозасига аниқ йўллади. Жамоалар танаффусга шу ҳисобда чиқиб кетишди.
Иккинчи таймни ҳам майдон эгалари шиддатли ҳужумлар остида бошлашди.
58-дақиқада жарима тўпини тепиш ҳуқуқига эга бўлган мезбонлар уни тезда ўйинга киритишди ва рақиб дарвозасини аниқ нишонга олишди. Гол муаллифи Жавоҳир Эсонқулов бўлди.
Ўйиннинг 86-дақиқасида меҳмонлар ўз жарима майдончалари ичида Тимур Усмоновни қўполлик билан тўхтатиб қолишди. Ҳакам “Локо” дарвозаси томон пенальти белгилади. Пенальтини эса Қувондиқ Рўзиев аниқ амалга оширди. Пенальтини “Қўқон-1912” футболчилари бошқачароқ тарзда амалга оширишди. Тимур Ҳакимов тўпни ўнг томонга ошириб берди. Қувондиқ Рўзиев эса уни голга айлантирди.
90-дақиқада Қувондиқ Рўзиев “Локо” дарвозасига тўртинчи голни киритди. Шу тариқа майдон эгалари Лига кубогидаги иккинчи учрашувда 4:0 ҳисобида ғалаба қозонишди ва кейинги босқичга чиқиш вазифасини муддатидан олдин ҳал этишди.
Лига Кубоги
“В” гуруҳи
2-тур
“Қўқон-1912” – “Локомотив” – 4:0 (1:0)
Голлар: Жавоҳир Эсонқулов (13,58), Қувондиқ Рўзиев (86, 90).
“Қўқон-1912”: 25. Сарвар Каримов, 8. Муҳаммаданас Ҳасанов, 10. Қувондиқ Рўзиев, 11. Тимур Ҳакимов, 13. Жавоҳир Эсонқулов, 14. Аваз Маматхўжаев, 15. Ойбек Рустамов, 17. Бехруз Садиллоев (99. Дилшод Баратов – 68), 20. Иқбол Маликжонов, 21. Тимур Усмонов, 27. Жасур Ёқубов.
“Локомотив”: 84. Ҳожиакбар Жўраев, 14. Азизбек Амонов, 19. Аваз Ўлмасалиев (43. Шохрух Мўминқулов – 46), 25. Жавоҳир Алижонов, 26. Дилшод Комилов, 52. Жалолиддин Жумабоев, 56. Жамолиддин Баҳромов, 75. Владислав Фомин, 78. Умар Адҳамзода, 79. Асадбек Исломов, 81. Бек Абдуллаев.
