Давлат хавфсизлик хизмати раиси Абдусалом Азизов Ўзбекистон футболига раҳбар этиб сайланганидан хабарингиз бор. Аслида футбол тепасига катта лавозимдаги одамларнинг келиши катта янгилик эмас, ҳамма гап ўша одам аслида ким экани, футболни қанчалик тушуниши ва ривожлантиришни хоҳлашида.
Хурсанд қиладиган жиҳати шундаки, ЎФАнинг янги Президенти футболдан унчалик ҳам узоқ эмас — айтишларича, у 2008-2009 йилларда Ўзбекистон футбол федерацияси вице-президенти бўлиб ишлаган, «Машъал» клуби президенти бўлган.
Азизовнинг бугунги баёноти футболни анча теран тушуниши, футболимизни йиллар давомида худди каламушдек кемирган тотализатор, келишилган ўйинлар, ҳакамларни сотволиш, уларга босим ўтказиш, футболчилар трансфери ортидан отнинг калласидан откат олиш, болалар футболи ва шунга ўхшаган қанчадан-қанча муаммолардан хабардор эканини кўрсатди. Энг ёққан ибораси шу бўлди: «Футбол — ҳалолик жойи бўлиши керак!» Биз эса футболимизда шунча йил ҳалоллик бўлмагани учун ҳам шу ҳолатдамиз.
Яна бир гап. Агар Абдусалом Азизов футболда келишилган ўйинлар ва тотализаторларни йўқотишга астойдил киришса, йўқота олишига ҳеч кимда шубҳа йўқ. Бунинг учун унда барча нарса бор. Фақатгина астойдил, қатъият билан киришилса, бас.
P.S: Абдусалом Азизовни яқиндан таниган ва бирга ишлаган одамлар унинг ҳалол, меҳнаткаш, бир сўзли ва қатъиятли инсон эканини айтишади. Умид қиламиз ва ишонамизки, ундаги ана шу хислатлар энди ўзбек футболи учун ҳам наф келтиради.
