«Бетис» клубининг чап қанот ҳимоячиси Хуниор Фирпо «Барселона» сардори Лионель Мессидан узр сўради.

2012 йилда испаниялик футболчи беш карра "Олтин тўп" соҳибини ижтимоий тармоқлар орқали «фоҳишанинг ўғли» деб ҳақорат қилган эди.

«Нима учун бундай қилганимни осон тушунтиришим мумкин. Энг яхши дўстим – Мессининг фанати. Мен эса Лео ҳақида ёмон гапларни ёздим. Бу болалар орасидаги келишмовчилик эди. Ўша пайтда бу гапларнинг ҳаётим ва фаолиятимга таъсир қилиши мумкинлиги ҳақида ўйламаганман. Албатта, Месси – дунёнинг энг яхши футболчиси. Бунга ҳеч қандай шубҳа йўқ. «Олтин тўп» ҳақида гап кетса, уни Мессига бериш кераклигини ҳар доим айтаман», — деди Фирпо AS нашрига берган интервьюсида.

Аввалроқ, «Барселона»нинг 22 ёшли футболчи хизматига қизиқиш билдираётгани ва уни тахминан 20-30 миллион евро эвазига сотиб олиши мумкинлиги ҳақида хабарлар тарқалган эди.