14 август куни Ўзбекистон Лига Кубоги чорак финал учрашуви доирасида “Динамо” жамоаси Самарқандда “Андижон” билан ўйинда ярим финал йўлланмаси учун кураш олиб боради.

ПФЛ расмий сайти 14 август кунги Қўқон ва Самарқанддаги ўйинлар соат 17:00да бошланишини эълон қилди. Иш куни саналмиш чоршанба кунги учрашув вақти ёзнинг иссиқ кунида нисбатан барвақт пайтда белгиланганлиги аксарият мухлисларнинг эътирозларига сабаб бўлиши мумкин. Шу боис бунинг сабабларини келтирамиз:

1. Ўзбекистон Лига Кубоги чорак финал баҳси бир ўйиндан иборат бўлиб, учрашув 90 дақиқа эмас, дуранг натижа бўлиб қолган тақдирда 120 дақиқа ва пенальтилар сериясигача давом этиши мумкин. Ҳозирда “Динамо” стадиони ёритгичлари замонавий ёритгичлар билан янгиланаётгани ва ҳали тўлиқ тайёр эмаслиги боис, ўйиннинг кечки вақтга қадар давом этиши эҳтимоли инобатга олиниб, учрашув 18:00 эмас, бир соат олдироқ 17:00да бошланади.

2. Шунингдек, чорак финал доирасидаги 4 та учрашув ҳам 14 август куни ўтказилиши ва барча учрашувлар ТВ-трансляция қилиниши режалаштирилгани боис, Самарқанддаги «Динамо» - «Андижон» ва Қўқондаги «Қўқон-1912» - «Насаф» учрашувлари 17:00да, Тошкентдаги «Пахтакор» - «Шўртан» ва Олмалиқдаги АГМК – «Металлург» ўйинлари эса 19:15 бошланиши белгиланган.