«Барселона» яримҳимоячиси Филиппе Коутиньо «Бавария»да тиббий кўрикдан ўтиш ва шартнома имзолаш учун Мюнхенга келди.

Маълум бўлишича, 27 ёшли хавбек янги жамоасида 10-рақамда ўйнайди. Мюнхенликларнинг техник ҳамкори ҳисобланган Adidas компанияси ўзининг инстаграмдаги саҳифаси орқали футболчининг фамилияси ва рақами туширилган футболка суратини эълон қилди.

Немислар бир йиллик ижара учун «Барса»га 8,5 млн евро тўлашгани айтилмоқда. Шунингдек, Филиппенинг 1 йиллик маоши – тахминан 12 млн евро ҳам харидор клуб зиммасида бўлади.

Клублар ўртасидаги келишувда «Бавария» Коутиньони 120 млн еврога тўла трансфер қилиш ҳуқуқига эгалиги қайд этилган.

Эслатиб ўтамиз, «Барса» бразилиялик яримҳимоячини 2018 йил январида «Ливерпуль»дан 120 млн еврога сотиб олган, харид битимида яна 40 миллион евро бонус шаклида тўланиши мумкинлиги белгиланган эди.