Хабарингиз бор, сентябрь ойида қитъамизда Жаҳон чемпионати-2022 иккинчи саралаш босқичи учрашувлари старт олади.
Саралаш баҳсларининг “D” гуруҳидан ўрин олган Ўзбекистон миллий терма жамоаси илк ўйинини сафарда Фаластинга қарши ўтказади.
Эктор Купер бошчилигидаги Ўзбекистон миллий терма жамоаси мазкур учрашувга тайёргарлик доирасида бугундан пойтахтимизда йиғин бошлади. Бош жамоамиз илк машғулотини “Жар” стадионининг захира майдонида ўтказди.
Илк машғулотда асосан миллий чемпионатимиздан тўп сураётган футболчилар иштирок этишди. Легионерлардан фақар Санжар Шоаҳмедов машғулотларда иштирок этмоқда. Қолган хорижда тўп сураётган футболчиларимиз шу кунларда ўз клублари сафида ўйинларини ўтказгач миллий жамоамиз ихтиёрига етиб келишади.
Таъкидлаш жоиз, бугундан йиғинга киришган терма жамоамиз Тошкентда 3 сентябрга қадар машғулотлар олиб боради.
Эртанги кунги машғулотлар “Чиғатой” базасида соат 20:00да ўтказилади.
