Италия чемпионатининг 6-тури доирасида "Интер" сафарда "Сампдория"га қарши баҳс олиб борди. Мазкур ўйинда "нерадзурри"нинг янги футболчиси Алексис Санчес захирадан майдонга тушди.

Учрашувнинг 20-дақиқасида Сенси ҳисобни очган бўлса, орадан 2 дақиқа ўтиб чилилик футболчи ҳисобдаги фарқни оширди.

Аммо биринчи бўлим тугаш арафасида Алексис Санчес қўполлик учун огоҳлантириш олган бўлса, иккинчи бўлим бошида симуляция учун иккинчи сариқ карточкани олиб, майдонни тарк этди.

Мезбонлар орадан кўп ўтмасдан Якуп Янктонинг голи эвазига ҳисобдаги фарқни қисқартиришди. Баҳснинг 61-дақиқасида эса миланликлар бир киши кам бўлиб ўйнаётганларига қарамай, учинчи гол уришди. Гол муаллифи — Роберто Гальярдини.

Ушбу ҳисоб ўйин охиригача ўзгармай қолди. "Интер" мавсумдаги дастлабки 6та ўйинда олтинчи ғалабани қўлга киритиб, А серия жадвалида пешқадамлик қилмоқда.

Италия А серияси, 6-тур
Сампдория – Интер 1:3 (0:2, 1:1)
Голлар: 0:1 – 20 Сенси, 0:2 – 22 Санчес, 1:2 – 55 Янкто, 1:3 – 61 Гальярдини.
Сампдория – Аудеро, Берешиньски, Шабо, Колли, Депаоли (Бонаццоли, 56), Линетти (Капрари, 73), Экдаль (Роналду Виейра, 69), Янкто, Мурру, Ригони, Куальярелла.
Интер – Ханданович, Шкриньяр, де Врей, Бастони, Кандрева (Д`Амброзио, 57), Гальярдини, Брозович, Сенси (Барелла, 65), Асамоа, Санчес, Мартинес (Лукаку, 56).
Огоҳлантиришлар: Бастони (10), Ригони (16), Линетти (33), Санчес (43), Шкриньяр (81).
Четлатиш: Санчес (46).