Хорижий сайтларда «Барселона» ҳимоячиси Пикега оид кутилмаган хабар тарқалди. Унга кўра, айни дамда «Космос» компаниясининг эгаси бўлган футболчи футболда яна битта турнир ташкил қилиш ғоясини илгари сурмоқда. Унинг ғоясига кўра, ушбу турнирда Европа кучли чемпионатларининг чемпионлари ҳам бир нечта топ даражадаги жамоалар иштирок этиши керак. Хўш, аслида, футболга яна битта турнир керакми?
ТИҒИЗ ТАҚВИМ
Бу таклифга АПЛ жамоалари бир овоздан «Йўқ!» деб жавоб беришса керак. Чунки чемпионатлар ичида айнан Англияда тақвим шундоқ ҳам тиғиз. Қолган чемпионатларда ҳам айни дамда битта турнирда қатнашишга етадиган бўш вақт йўқ. Фақат ёзда дам олишади, унда ҳам жамоалар, футболчилар трансфер билан банд бўлишади.
ЎРИНГА ЎРИН
Пикенинг турнирини (шартли равишда шундай атаб турамиз) бошқа бир турнирнинг ўрнига қўйиш фикри ўзини оқлармикин? Бунинг учун бугунги кун футболида ўзини оқламаётган бирор-бир мусобақани топишга тўғри келади. Чемпионлар Лигаси? Асло! Ушбу мусобақа бугунгача ўз шиддатини йўқотмаган ва бундан кейин ҳам шундай бўлади. Клублар ўртасидаги жаҳон чемпионати? Мазкур турнир шундоқ ҳам ўзгарди ва у қитъаларда ўтказиладиган чемпионатларга бевосита боғлиқ. Пике ташкил этмоқчи бўлган турнирда эса чемпион жамоалар танлаб олинади. Яъни кучли бешликда чемпион бўлган клублар қатнашиши кўзда тутилган, клублар ўртасидаги жаҳон чемпионати эса бундай фарқ қилади.
ХАЛҚАРО ЧЕМПИОНЛАР КУБОГИ
Пикенинг мусобақасини фақат битта турнир билан алмаштириш мумкин — Халқаро чемпионлар кубоги ўртоқлик турнири. Ушбу мусобақада иштирок этадиган жамоалар учун алоҳида регламент белгиланмаган. Фақат бунинг учун Пикенинг турнирини ўртоқлик мақомида ўтказишга тўғри келади. Боиси ёзги таътил вақтида ўтказиладиган турнирда клублар ёш футболчилари ёки янги харид қилинган футболчиларни синовдан ўтказишни мақсад қилишади. Агар турнир расмий мақомда бўлса, клублар бу ишни амалга ошира олмасликлари ва мусобақада қатнашишга унчалик хоҳиш билдирмаслиги мумкин. Аслида ҳам ёзги трансфер мавсуми вақтида ўртоқлик турнири ўтказган маъқулроқ.
Бу Пикенинг биринчи таклифи эмас. Испаниялик ҳимоячи олдин ҳам бошқа ташаббуслар билан чиққан. Кўрамиз, бу галги таклифи амалга ошармикин?
