Сешанба куни «Реал» Истанбулда жуда қийин учрашув ўтказган бўлсада, керакли натижани қайд этишга муваффақ бўлганидан хабарингиз бор. Бир қарашда ўзининг иккинчи имконидан фойдаланаётгандек кўринган Ҳамес Родригес иккинчи бўлимдагина майдонга тушди. Ҳозирча колумбиялик футболчи жамоадаги ярим ҳимоячилар қаторида энг номдорларидан бири бўлиб турган бўлсада, унинг Мадридда қолиши катта савол остида турибди. Хўш ҳозирда Зидан қўл остидаги ярим ҳимоячиларнинг аҳволи ва клубда тутган ўрни қандай? Бугун ушбу саволга жавоб излашга уруниб кўрамиз.

Казимиро

Асосий таркибнинг алмаштириб бўлмас футболчиси саналадиган Казиморо Зиданнинг энг ёқимтой футблчиси саналиши ҳеч кимга сир эмас. Ушбу мавсумда қаҳрамонимиз майдон марказидаги барча нуқтада меҳнат қилишга муваффақ бўлган эътиборга молик. Айнан унинг ишончли ўйини туфайли «Реал Мадрид» қанотлардан фойдаланган холда позицион ҳужумга ўтиши йки тезкор қарши ҳужумга ўтиб кетиши мумкин. Ҳозирда Казимиро клубдаги ярим ҳимоячилар ичида энг фойдалиси десак, адашмаган бўламиз.

Лука Модрич

Амалдаги «олтин тўп» эгаси Зидан томонидан қадрланадиганлар сирасига киради. Ушбу мавсумда жароҳатларга ўралашиб қолган бўлсада, Зидан унинг асосий таркибдаги ўрнини мустаҳкамлаб бормоқда. Модрич Зидан ўйин фалсафасига кўра, «қироллик клуби»нинг мияси вазифасини бажаради. Аслида ушбу позиция Ҳамес Родригесники бўлсада, Колумбия терма жамоаси сардори 34 ёшлик хорватни четга суриб ташлай олмаяпти.

Тони Кроос

Мавсум бошида кўплаб мухлис ва мутахассислар германиялик футболчининг келажагига шубҳа кўзи билан қарашгани рост. Қувонарлиси шундаки, Кроос ўзининг аввалги спорт формасини тиклаб олишга муваффақ бўлди ва ўта сифатли футбол намойиш этмоқда. Сўнгги учрашувларда «Реал Мадрид»нинг ўйин темпини белгилаб бераётган ярим ҳимоячи ЙЧЛ доирасидаги учрашувларда ҳам ўзини кўрсатишга муваффақ бўлмоқда. Бундан кўриниб турибдики Тони ўзининг майдон марказидаги ўрнини ҳеч кимга бериб қўймоқчи эмас.

Феде Валверде

21 ёш бўлишига қарамай, уругвайлик ярим ҳимоячининг майдондаги ҳаракатлари таҳсинга сазовар. Ушбу мавсумда Ҳамесдан кўра ишончлироқ кўринаётган Валверде «Галатасарай»га қарши учрашувни асосий таркибда бошлади ва 79-дақиқага қадар тўп сурди. Феде 79 дақиқа давомида Зидан томонидан берилган барча вазифани аъло даражада бажарди ва мухлислар олқишига сазовор бўлди. Унинг ўрнига майдонга тушган Ҳамес Родригес эса, ўйин темпини пасайтириб юборди. Балки у Зидандан айнан шу кўрсатмани олиб майдонга тушгандир? Яна ким билади дейсиз?

Ҳамес Родригес

Бир қарашда футболчининг «Бавария»дан қайтиб келиши барча нарсани ўзгартириб юборгандек бўлсада, аслида ҳаммаси ўз ўрнида турибди. Зидан ҳалигача Ҳамесга бўлган муносабатини ўзгартирганича йўқ. Ҳозирча қаҳрамонимиз юқорида номи зикр қилинган футболчилардан бири ўйинда қатнаша олмасагина асосий таркибда кўриниш бермоқда. Акс холда, учрашувни Заҳира майдонида кузатишдан бошқа чора топа олмаяпти.

Иско

Испаниялик ярим ҳимоячи бу мавсумда Зидан томонидан унутиб қўйилганлар ичида пешқадам. Афсуски футболчинин ўйини Сантияго Солари даврида кескин пасайиб кетди ва Изко анча вақт ўтган бўлсада, спорт формасини тиклай олмаяпти. Футболчи катта эҳтимол билан ўз фаолиятини кейинг мавсумда бошқа клубда бошласа, ажаб эмас.