Ла Лига навбатдаги турида сенсация қайд этилди.

“Леванте” майдонига сафар уюштирган “Барселона” жамоаси кутилмаганда 1:3 ҳисобида мағлубиятга учради.

Таъкидлаш керакки, “Леванте” ўйинни жуда яхши бошлади. Гарчи “Барселона” тўп билан муомала қилиш борасида устунликка эришган бўлса-да, мезбонлар хавфлироқ ҳаракат қилишди, ҳужумлар уюштиришди. Бироқ ҳисобни очиш Мессига насиб этган экан. Нелсон Семеду йиқитилгач, бош ҳакам 11 метрлик жарима зарбасини белгилади. Айримлар “Месси ушбу пенальтини голга айлантира олармикин?” дея ўйлаган бир паллада аргентиналик футболчи дарвозабонга ҳеч қандай имконият қолдирмади. Лекин ҳаммаси ана шундан кейин бошланди.

Месси ҳисобни очганидан кейин “Бўлди, “Барселона” зафар қучади”, дея ўйлаб, Каталония клубининг ғалабасига ишониб қолганимиз рост. Биз-ку майли, Эрнесто Вальверде ва “Барселона” футболчиларининг ўзи ҳам ғалабага ишониб қолишган кўринади. Боиси, иккинчи бўлимда “Леванте”нинг ўйини кучайиши билан бир қаторда “Барселона”нинг шашти пасайиб борди. Иккинчи бўлимнинг даҳшатли 7 дақиқаси эса масалага узил-кесил нуқта қўйди. Дастлаб Пикенинг хатоси натижасида “Леванте” футболчиси ҳисобни тенглаштирди. Кейин эса Борха Майораль фантастик зарба билан жамоасининг иккинчи голини киритди. “Барселона” футболчисига тўп тегиши натижасида юзага келган учинчи гол эса якунда мезбонларнинг ғалабасини таъминлаб берди.

"Леванте" – "Барселона" 3:1

"Сьюдад де Валенсия"

Голлар: 0:1 – 38, пенальти Месси, 1:1 – 61 Кампанья, 2:1 – 63 Майораль, 3:1 – 68 Радоя.

"Леванте": Фернандес, Везу, Клерк, Постиго, Мирамон, Барди (Рочина, 62), Мелеро, Радоя, Кампанья (Кабако, 87), Майораль, Моралес (Вукчевич, 82).

"Барселона": тер Стеген, Лангле, Семеду, Серджи Роберто, Пике, де Йонг, Артур (Фати, 66), Видаль (Бускетс, 64), Суарес (Карлес Перес, 41), Гризманн, Месси.

Огоҳлантиришлар: Артур (12), Барди (52), Гризманн (56), Пике (66), Лангле (67), Серджи Роберто (81), Фати (86).