Италиянинг «Наполи» клуби ҳужумчиси Хосе Кальехон қишда Хитойнинг «Далянь Ифан» жамоасига ўтиши мумкинлиги ҳақида Il Mattino хабар тарқатди.
Испаниялик футболчининг «Наполи» клуби билан тузилган шартномаси 2020 йилнинг ёзида ўз якунига етади. “Наполи” клуби Президенти Аурелио Де Лаурентис Кальехон билан шартномани узайтириш ниятида эмаслигини билдирди. Шу боис, 32 ёшли футболчи катта эҳтимол билан қишки трансфер бозорида жамоани тарк этади.
Агар ушбу трансфер амалга ошадиган бўлса Кальехон “Наполи”даги собиқ жамоадоши Марек Гамшик билан яна йўли кесишади.
Шунингдек, шу йилнинг июль ойидан бери ушбу жамоада ишлаётган Рафаэль Бенитес ўз вақтида Кальехон билан бирга «Наполи» клубида фаолият олиб борган.
Жорий мавсумда Кальехон “Наполи” таркибида 14 та учрашувда майдонга тушиб, битта гол киритишга эришди.
