«Тоттенхэм» клуби ҳужумчиси Сон Хын Мин 11-тур доирасида «Эвертон» (1:1) клубига қарши учрашувдан кейинги аҳволига аниқлик киритилди.
Учрашувнинг 79-дақиқасида жанубий кореялик футболчи қанотда рақиб футболчига “подкат” билан қаршилик қилади. Натижада, унинг ташланишидан сўнг, рақиби Андре Гомеснинг оёғи синади.
Учрашув бош ҳаками Мартин Аткинсон Сонга қизил карточка кўрсатди. Ҳужумчининг ўзи эса рақибига етказган жароҳатидан сўнг даҳшатга тушди.
The Sun нашрининг хабар беришича, ўйиндан кейин Сон кийиниш хонасида ҳеч ким билан гаплашмади. Микст-зона орқали юзини тўсганча ўтиб кетган Сон, жанубий кореялик журналистларнинг саволларига ҳам жавоб бермади.
Ўйин якунланиши билан Сон телефонларини ўчириб қўйди ва Жанубий Кореяга - ота-онасининг ёнига учиб кетди.