Лондоннинг "Челси" клуби бош мураббийи Фрэнк Лэмпард жамоада жарималар тизимини жорий этди дея хабар тарқатмоқда Daily Mail.

Манбанинг ёзишича, машғулотларга кеч қолган футболчилар 20 минг фунт жаримага тортилади. Шунингдек, жамоанинг йиғилишларига кеч қолганлар 500 фунт тўлашига тўғри келади. Агар футболчи ўйин куни автобусга кеч қолса ёки шифокор қабулга кеч қолса у ҳолда 2500 фунт жаримага маҳкум. Жамоада ички йиғилиш бўлаётганида ёки жамоа билан биргаликда овқат маҳалда телефондан фойдаланиш мумкин эмас -1000 фунт, шунингдек, ўйин куни ҳам футболчи режадагидек кийинмаса 1000 фунт “чақиб” олади. Агар футболчи касаллиги ёки жароҳати ҳақида дам олиш кунидан бир кун аввал огоҳлантириб қўймаса, ўз 10 минг фунт билан “огоҳлантирилади”. Лэмпарднинг тартиб-интизом кодекси  "Челси" машғулот базасига осиб қўйилган.

Агар қоидабузарлар жаримани 14 кун мобайнида тўламаса, у ҳолда жарима миқдори ошиб бораверади. Жарималарни мураббийлар штаби назорат қилади. Жаримадан тушган пуллар хайрия йўлида ишлатилади ёки жамоа тадбирларига сарф қилинади.

Қайд этиш керакки, агар агентлар расмий иш билан шуғулланмаётган бўлса, у ҳолда улар “Челси”нинг машғулот базасига келишларини ҳам Лэмпард таъқиқлаб қўйган.

Бундан ташқари, футболчилар дам олиш кунлари хорижга чиқиб кетаётганлиги ҳақида маълумот беришлари шарт!