ФИФАнинг ўзбекистонлик рефериси, Ўзбекистон футбол ассотсиатсияси (ЎФА) биринчи вице-президенти Равшан Эрматов расман ҳакамлик фаолиятини якунлагани эълон қилинди. Бу ҳақида Осиё футбол конфедерацияси (ОФК) қароргоҳида ташкил этилган махсус маросимда маълум қилинган.
Равшан Эрматов маросимда ОФК томонидан Осиё футболига қўшган ҳиссаси учун махсус соврин билан тақдирланди.
“17 мавсум давомида ОФКда фаолият юритиш мен учун улкан шараф бўлди. Осиё Чемпионлар Лигасининг бешта финали, тўртта Осиё Кубоги ва учта Жаҳон Чемпионатида ишлаш менга ёрқин хотираларни берди.
Мен Осиё футбол оиласининг аъзоси эканимдан фахрланаман. Энди таёқчани ёш касбдошларимга топшириш вақти келди. Ишончим комил, улар ўз олдига энг олий мақсадларни қўйган ҳолда, юқори чўққилар учун интилади”, дейди Эрматов.
Маълумот учун, Эрматов 2003-2019-йилларда ҳакам сифатида фаолият юритган. У 16 йиллик фаолияти давомида Жаҳон Чемпионати финал босқичида 11 та ўйинни бошқариб Жаҳон Чемионатида энг кўп ўйин бошқарган ҳакам бўлган. Шунингдек, у беш марта Осиёнинг энг яхши ҳаками номига лойиқ кўрилган.
