Илк бор ўтказилган «Бунёдкор Кубоги»да ғолиб чиққан Ўзбекистон ўсмирлар терма жамоаси бош мураббийи Азамат Абдураимов финал учрашувидан кейин ўз фикрлари билан ўртоқлашди.
- «Бунёдкор» футбол клуби расмийларини йил якунида шундай турнир ташкил қилиб, муваффақиятли ўтказгани билан табриклайман! Мусобақа биз учун ҳар томонлама фойдали бўлди, дея оламан. Гарчи беш кун давомида ҳар куни майдонга чиқиш ўзига хос қийинчиликларни туғдирган бўлса-да, болалар ўзларида куч топа олишди. Бугунги финал катта босим остида ўтди. Финалга бир-бирига лойиқ жамоалар чиқди, дейиш мумкин. Яна айтиш керакки, барча жамоалар мусобақадаги иштирокидан мамнун бўлди. Турнир ҳали 15 ёшни қаршиламаган болаларга катта тажриба мактабини бажариб берди.
Терма жамоа мусобақага қадар атиги бир марта машғулот ўтказди. Шу боис маълум қийинчиликларга дуч келдик. Боиси, болалар бир-бири билан майдонда тўп сурмаган, тушунмовчиликлар бўлиши аниқ эди. Лекин болалар мусобақа давомида энг яхши ўйинларини кўрсатишди. Терма жамоада тўп суришга лойиқлигини исботлашди. Мусобақа давомида бошқа жамоаларни ҳам кузатдик. Уларнинг таркибидаги энг яхшиларни кўз остимизга олиб қўйдик.
