Мухлислар олқиши. Мезбонлик ҳисси. Ўз уйида хўжайин эканлигини исботлашга интилиш. Бу аксар мезбон жамоаларда кузатиладиган ҳолат. Мессининг фикрича, «Реал»да ҳам бу жиҳат бор.
Аргентиналик футболчи ҳақ. Негаки «қаймоқранглилар»ни «Сантьяго Бернабеу»да енгиш жуда қийин масала. Ахир қаршингда юз мингга яқин мухлислар сени олқишлаб турса, тағин сен «Дунёнинг энг кучли жамоаларидан бири» дея номланган клубда ўйнасанг, жон-жаҳдинг билан ҳаракат қиласан. «Реал» ўз уйида исталган рақибни керагидан ортиқ даражада муаммоларга дучор қила олади.
«Барселона» етакчиси Лионель Мессининг фикрича, «Барселона»га қарши ўйинларда ана шу жиҳат «Реал»нинг зарарига ишларкан. Каталония клуби етакчиси буни шундай изоҳлади: "Бернабеу" да ўйнасак, биз кўпроқ эркин ҳудудларга эга бўламиз. «Реал» кўпроқ ҳужум қилади, чунки улар мезбон ва доим олдинга интилишади, устунликка эришишга ҳаракат қилишади. Бу эса қарши ҳужумларда бизга очиқ ҳудудлар яратиб беради, ёки рақиб хато қилганида ҳам бўш зоналар кўп бўлади». Мантиқан тўғри. Аксарият ҳолларда қарши ҳужумда рақибни очиқ зоналарда ушлайдиган «Реал»нинг ўзида ҳам шу камчилик сезилади баъзан. Умуман, катта куч билан ҳужумга ташланган жамоа рақиб кутилмаганда қарши ҳужумга ўтганида очиқ ҳудудларни ёпишга улгурмай қолади. Хусусан, «Реал» ҳам. Эҳтимол, шунинг учун айнан Месси «Реал» майдонида кўплаб голлар уришни уддалаган.
Эртага «Реал» рақиб майдонида ўйнайди. Месси бу ҳақда ҳам фикрини айтди. «Реал» «Камп Ноу»да бошқача ўйнайди. Прессингни кучайтиради, эҳтиёткорликни оширади, кўпроқ қарши ҳужумларда ҳужумчиларининг тезлигига таяниб ҳаракат қилади. Бу эса «Барселона» учун қийинчилик туғдиради. Биз ўз уйимизда ўйнаганга қараганда меҳмонда ўйнасак, «Реал»ни мағлуб этишимиз осонроқ бўлади. Чунки меҳмонда 90 дақиқа очиқ ўйин бўлади, уйимизда эса ёпиқ ва қийин ўйин ўтказамиз», деди Месси.
Кўрамиз, эртанги ўйинда қандай сценарий гувоҳига айланар эканмиз? Шуниси аниқки, таркиб ва жамоаларнинг ҳолатидан қатъи назар, «эль-класико», барибир, «эль-класико».
Низомжон ИСЛОМОВ
