Бугун Ўзбекистон дзюдо федерациясида ёш спортчиларимиз учун япониялик таниқли мураббий, халқаро йўриқчи (инструктор) Тому Тори иштирокида маҳорат дарси ўтказилди. Ушбу тадбирда Ўзбекистон Миллий олимпия қўмитаси вице-президенти, Ўзбекистон дзюдо федерацияси раиси Азизжон Камилов, Миллий Паралимпия ассоциацияси раиси Мухторхон Ташходжаев, Италия кураш (ўзбек кураши) федерацияси президенти Витторио Жоржи, Япония элчихонасининг вакили Астуши Суда ҳам иштирок этди.

Меҳмонлар тадбирни Ўзбекистон дзюдо федерациясида қуриб фойдаланишга топширилган янги зал билан танишишдан бошладилар. Шундан сўнг Томи Тори дзюдо бўйича Ўзбекистон ёшлар терма жамоаси вакиллари ва пара-дзюдо жамоамиз аъзолари учун маҳорат дарсларини ўтказди. Японча техник усулларга асосланган мазкур мастер-класс дзюдочиларимизнинг маҳорати янада ошиши йўлида ас қотиши, шубҳасиз. Тадбир якунида қимматли вақтини аямай маҳорат дарсини ўтказган Тому Торига эсдалик совғалари тақдим этилди.