Айни дамда ОТЖ сафида Таиландда бўлиб турган «Насаф» жамоаси футболчиси Дилшод Саидов билан кичик суҳбат уюштирдик.

— Гуруҳимиздаги вазиятга қандай баҳо берасиз?
— Очиғи, имкониятларимиз яхши деб ҳисоблайман. Жанубий Кореяни ҳурмат қиламиз, бироқ сира қўрқмаяпмиз.

— Жамоанинг машғулотлар тартиби қандай?
— Ҳаммаси режа бўйича кетмоқда. Ҳар куни икки маҳал машғулот ўтказамиз. Асосий мақсадимиз жисмоний ҳолат борасида мусобақада энг кучли жамоа бўлиш. Бундан ташқари, барча футболчилар ўзи устида тинмай ишламоқда.

— Айни дамда олимпия жамоамизнинг етакчиси ким?
— Бизда биринчи ўринда жамоавий ўйин туради. Бундан ташқари, барчамиз ўз клубларимизда лидер футболчилармиз. Ўз етакчилик қобилиятларимизни жамоавий ўйинни шакиллантиришга қаратганмиз десам, адашмаган бўламан.

— ОТЖнинг мусобақадаги асосий мақсади нима?
— Албатта, чемпионлик.

— Жанубий Корея билан мусобақа олдидан ўртоқлик учрашувида иштирок эдинглар. Хўш, бу кимнинг фойдасига ишлайди?
— Менимча бунинг яхши томонлари бироз кўпроқ. Иккала жамоа ҳам бир-бирини яхши ўрганиб чиққан. Ўйин давомида улар ҳам худди биз каби эҳтиёткор футбол намойиш этади.

— Захирада қолаётган йигитларнинг кайфияти тушиб кетмайдими?
— Асло йўқ. Биз захира ўриндиғида бўлсакда, жамоамизнинг бошқачароқ услубга ўтишни истаганда қўл келишимиз мумкин. Мураббий барчасини инобатга олиб футболчиларни жамлаган. Боз устига, ОТЖда рақобат жуда кучли. Барчасини мураббий ҳал этади ва биз унинг сўзларини доиммо ҳурмат қиламиз.

— Ҳаёт-мамот учрашуви олдидан мухлислар ва stadion.uz уқувчиларига тилакларингиз бўлса, марҳамат.
— Биринчи навбатда, халқимиз бизни дуо қилишини ва охиригача қўллаб-қувватлаб туришини илтимос қилиб қоламан. Айни дамда уларнинг бизга бўлган ишончи жуда муҳим. Ушбу мусобақада уларни хурсанд қилиш учун бор кучимиз билан ҳаракат қилишга ваъда берамиз. Шу ўринда stadion.uz ижодкорларига ҳам омад тилаб қоламан.