“Локомотив”нинг мағлубияти билан якунланган учрашувидан сўнг, Тожикистон клуби етакчиси Марко Милични суҳбатга тортдик.

- Бугунги ўйин ҳақида фикрларингиз?

- Учрашувда иккинчи рақамда ҳаракат қилишни аввалдан келишиб олган эдик. Барчаси кўнгилдагидек ўтди. Бизни қўллаб-қувватлаб туриш учун Тожикистондан етиб келган мухлисларга ўз миннатдорчилигимни билдириб ўтмоқчиман. Уларнинг ўйин боришидан тутган ўрни жуда катта бўлди.

- Бугунги учрашув олдидан  “Истиқлол” аутсайдер эди, бироқ якунда ғолиб чиқдинглар. “Локомотив” сизлар тахмин қилгандек қаршилик кўрсатдими?

- Очиғи, биз бу жамоа ҳақида ўйиндан олдин етарлича маълумотга эга эдик. Унинг футболчиларидан тортиб, мураббийига қадар. Уларнинг нималарга қодир эканлигини аввалдан чамалаб олганмиз. Мураббийларимиз барчасини инобатга олган ҳолда ўйинга тўғри тактика танлашди. Айнан шу фактор якунда ҳал қилувчи омилга айланди деб ўйлайман. “Локомотив” бугун фаол бўлишга уринди, лекин бизнинг ўйинга танлаган тактикамиз ғалаба келтирди.

- Жамоанинг Саудия Арабистонида бўлиб ўтадиган ўйинда имкониятлари қандай?

- Рақибларимизда қанча имконият бўлса, бизларда ҳам шунча. Биз чемпионлармиз. Ўз мақомимиздан келиб чиқиб исталган рақибни мағлуб этишимиз шарт.