Хабарингиз бор, УЕФА "Манчестер Сити" клубини икки йилга еврокубоклардан четлатиш ҳақида қарор қабул қилди. Бундан ташқари, "шаҳарликлар" 30 миллион евро миқдорида жаримага тортилишди.

Манчестерликлар қўл қовуштириб ўтиришмоқчи эмас. Жамоанинг ЕЧЛда иштирок этмаслиги клубга жиддий молиявий зарар етказади. Бундан ташқари, "Сити" янги футболчиларни қўлга киритиши, етакчиларни ушлаб қолиши қийин кечади. Аммо Хосеп Гвардиола ва жамоа раҳбарияти хавотирга тушмаяпти.

Ҳуқуқшуносларнинг фикрича, "Ман Сити" Европа чемпионлар лигасининг 2020/2021 йилги мавсумида иштирок этиш имкониятини сақлаб қолиши мумкин. Жамоа Лозанна шаҳридаги Спорт арбитраж судига мурожаат қиладиган бўлса, якуний қарор қабул қилингунга қадар УЕФА қарорини вақтинчалик тўхтатиб туришни сўраши мумкин. Шунда "Сити" ЕЧЛнинг келаси мавсумида қатнашиши мумкин. Аммо кейинчалик CAS УЕФАнинг қарорини ўз кучида қолдирса, "шаҳарликлар" ЕЧЛнинг 2021/22 ва 2022/23 йилги мавсумларини ўтказиб юборишига тўғри келади.

Санкциядан қутулиб қолишнинг яна бир йўли мавжуд. Англияликлар Спорт арбитраж судидан ишни тезроқ кўриб чиқишни сўраши мумкин. ЕЧЛ-2020/2021 гуруҳ босқичига қуръа ташлаш маросимигача (27 август) CAS дисквалификация ҳақидаги қарорни бекор қилса, "Сити" мусобақада иштирок этиш ҳуқуқини сақлаб қолади. Аммо бундай ҳолатда клуб ҳам, УЕФА ҳам ўз ҳақ-ҳуқуқини исботлаш учун етарли вақтга эга бўлмайди.

Шу боис, "Манчестер Сити" учун биринчи вариант маъқулроқ кўринмоқда. Жамоа УЕФА қарорининг тўлиқ матнини олганидан кейин апелляция бериш учун 10 кунлик вақтга бўлади.