"Эл-класико" кутилганидек кечяпти. Ҳозирча. Ёмғир ёғаётганини ва жамоаларнинг бугунги ўйинга кўнгилдагидек таркиб билан етиб келмаганини инобатга олсак, темп ёмон эмас.
Биринчи бўлимда жамоалар тенг ўйнашди. Ҳар иккала жамоада ҳам етарлича вазиятлар юзага келди. "Реал" футболчилари сўнгги узатма ва зарбада янглишган бўлишса, "Барселона"нинг вазиятларида Тибо Куртуа 3 бор муқаррар голдан жамоасини сақлаб қолди.
Биринчи бўлимда "Барселона" негадир қарши ҳужумда суст ўйнади. Бу ҳолат икки-уч бор кўзга ташланди. Жамоа тўлиқ "тики-така"га таяниб ҳаракат қиляпти.
Бош ҳакам Матео Лаос ҳам "эл-класико"га жиддий ёндашганини футболчиларга кўрсатиб қўйди. У биринчи бўлимнинг ўзидаёқ бир неча бор чўнтагидан сариқ карточка чиқарди.
"Реал" мухлислар кутганидан яхшироқ ҳаракат қилмоқда. Фақат ўша гап, сўнгги паслар ва якуний зарбада муаммолар бор.
Биринчи бўлим ҳақида шулар. Умид қиламизки, иккинчи бўлимда голлар гувоҳига айланамиз. Ахир голсиз "эл-класико" "эл-класико" бўлармиди?
Низомжон ИСЛОМОВ
