«Челси»нинг ютуқлари ҳозирча локал, кейинги мавсум глобалга айланиши мумкин. Бу менинг бироз эҳтиёткорлик билан қилаётган тахминим.

Пастки дивизион пойгаларида ўзини кўрсатиб Формула-1 жамоасига таклиф оладиган ҳар қандай истеъдодли пилот ҳам дастлаб ўз болидини кўп марта уриб олади. Жамоа учун урилган болидлар бу сарф-харажат бўлишига қарамай пойгачига имкон берилади ва у якунда лидерга айланади.

Лэмпардга ҳам имкон бериш керак. У ҳали топ-мураббий эмасдир. Орада ютқазиб турибди. Лекин «Челси»нинг бугунги кундаги ўйинини кўриш завқ бағишлайди. Мана, кичик локал натижалар ҳам қайд этиляпти. «Челси» «Ливерпуль»ни кубокдан чиқариб юборди. Фрэнки ҳам топга айланади, бироз ўтгач.

«Ливерпуль» етиб келдими? Йўғ-э. Дарров шу хаёлга бордингизми. Ҳар қандай клубда мавсум давомида маълум муддат инқироз бўлади («Арсенал»нинг рекорди энди бу 100 йилда бир бўладиган воқеа). «Ливерпуль» мана ҳозир шу инқирозни бошдан ўтказяпти. Қанча давом этиши энг асосий масала. Лекин, менимча кечагиси охиргиси эди. Рекорд темпида югуриб кетаётган атлет сал мувозанатни йўқотса яна тезликни тиклагунча 3-4 қадам сарфлайди. «Атлетико» ўрнида хушёр бўлаверардим.

Дарвоқе, кеча зўр ўйин бўлди. Лэмпард - Клопп янги қарама-қаршилик. Улар ўртасида принципиаллик йўқ. Шунчаки чиройли футбол.

Даврон Файзиев.