Кириш Регистрация

Хабарлар

«Интер»нинг барча даврлардаги футболчилардан ташкил топган рамзий жамоа

Баҳо:
+ | -

Stadion.uz Италиянинг «Интер» клуби тарихидаги энг кучли футболчилардан ташкил топган рамзий жамоани эътиборингизга ҳавола этади.

Дарвозабон

Вальтер Дзенга (Италия)

Пальюка, Тольдо, Сезар ва Ханданович. Бу рўйхатни узоқ давом эттириш мумкин, бироқ «Интер» жамоасида Вальтер Дзенга номли футболчи бўлгани боис улар четга чиқишга мажбур. Қаҳрамонимиз «Интер» сафида 16 та мавсумни ўтказган бўлса-да ўзининг сўнгги мавсумида чемпионликни қўлга киритган. Шунингдек, унинг ҳисобида иккита Европа чемпионлар кубоги ҳам мавжуд. Унинг дарвозадаги фантастик ўйинлари сабабли мухлислар «ўргимчакодам» лақаби қўйилган бўлиб Дзенга доимо мухлислар ишончини оқлашга муваффақ бўлган кам сонли футболчилардан бири эди.

Ҳимоячилар

Хавьер Дзанетти (Аргентина)

«Интер» сафида 858 та учрашувда майдонга тушган «Трактор»20 йил давомида клуб шарафини муносиб ҳимоя қилди. Клуб миқиёсидаги деярли барча мусобақада ғолиб чиққан Дзанетти янги авлод мухлислари учун «Интер»нинг тимсолига айланиб улгурган шахс десак, адашмаган бўламиз.

 

Жузеппе Бергоми (Италия)

Итальянлар доимо кучли ҳимоячилари билан қолганлардан ажралиб турган. «Интер» сафида ҳам барча даврларда кучли ҳимоячилар ҳаракат қилган, бироқ биз нафақат «Интер», балки бутун бошли футбол тарихидаги энг кучли ҳимоячилардан бири -

Жузеппе Бергомини танладик. Жузеппе бутун карьерасини «Интер» учун сарфлади ва «кўк-қоралар»сафида 20та мавсумни ўтказди. Икки бор скудеттони қўлга киритган футболчи ЖЧда ҳам ғолиб чиқишга муваффақ бўлди. Унинг уч карра УEФА кубоги ғолиблигини қўлга киритгани ҳақидаку гапирмаса ҳам бўлади.

 

Тарчизио Бурньич (Италия)

Барези, Матерацци сингари жангчилар турганида нега айнан Тарчизио Бурньични танлаганимиз барчада савол уйғотиши аниқ. Ўз фаолияти давомида ҳимоянинг барча нуқталарида ҳаракат қилган футболчи «Ювентус»нинг 12та таклифини рад этган ер шаридаги ягона футболчи эканлигидан хабарингиз борми? Ўз вақтида Турин суперклуби «қоя»га (унинг лақаби шундай эди) «Интер» бераётган маошдан 7 баробар кўпроқ маош таклиф қилсада ўз мақсадига ета олмаганини-чи? Замонавий футболчилар Тарчизиодан вафодорликни ўрганишлари керак!

 

Жачинто Факкетти (Италия)

191 см.бўйга эга бўлишига қарамай, чап қанотни бир ўзи ёпишга қодир футболчи ҳақида эшитмаган бўлишингиз мумкин. Бутун фаолияти давомида «Интер»да ҳаракат қилган Факкетти 2006-йилда оламдан ўтган. У футболчилик фаолиятини якунлагач ҳам клубга содиқ қолди ва жамоанинг скаути сифатида фаолият олиб борди. У футболчилик даврида қўлга киритиш мумкин бўлган барча совринларга эга чиқди ва клуб мухлисларининг ёқимтойига айланди. У оламдан ўтганида «Интер»нинг 200 минг мухлиси уни сўнгги манзилга кузатиб қўйиш учун кўчага чиққанини ўзи Факкети нақадар буюк футболчи бўлганини англатади.

Ярим ҳимояилар

Габриэле Ориали (Италия)

 

Камбьяссо ҳам «кўк-қоралар»учун катта меҳнат қилганлардан, бироқ биз Ориали вариянтини танладик. Бунинг сабаби бежиз эмас. «LeGazettadellaSport» нашри берган хабарларга қараганда мухлислар томонидан ўтказилган сўровномада Ориали 20 асрнинг Италиядаги энг техникаси кучли футболчиси деб эътироф этилган. Энг қизиғи шундаки, таянч ярим ҳимоячиси ўз фаолияти давомида «Интер» сафида бирорта қизил карточка олмаган.

 

Луис Суарес (Испания)

Лотар Маттеус «Интер» сафида 4 йил ҳаракат қилган бўлса, Суарес «кўк-қоралар» учун ўзининг 9 йилини берган. «Олтин тўп»ни қўлга киритган футболчи «Интер» сафида деярли барча мусобақада ғолиб чиқди ва А серияда уч бор чемпионликни қўлга киритган. Умуман олганда,Луис Суареснинг нафақат «Интер», балки бутун бошли Испаниянинг 20-асрдаги энг яхши футболчиси саналади.

 

Марио Корсо (Италия)

Снейдер Моуриньо қўл остида шов-шув кўтаргани рост, бироқ унинг «тўполони» атиги уч мавсум давом этган,холос. Корсо 16 йил давомида клуб шарафини ҳимоя қилди ва 1957-1973-йилга қадар асосий таркибдан тушиб қолгани йўқ. 565 та учрашув ва 158 та гол. Евро-68 ғолиби — клуб сафида энг кўп соврин ютган футболчилардан бири саналади.

Хужумчилар

Сандро Маццола (Италия)

Буюк футболчининг ўзданда буюк футболчи ўғли. «Интер»нинг энг гуллаган даврларида жамоа шарафини ҳимоя қилган Маццола клуб сафида 600га яқин учрашувда майдонга тушган бўлиб унинг ҳисобида 158та гол мавжуд. 4та чемпионлик, иккита Чемпионлар кубоги ва 6та ички кубокларда зафар қучган футболчи ҳам Евро-68 ғолибларидан бири саналади.

 

Луис Назариу Роналдо (Бразилия)

Виери ва Алтобеллидан узур сўраганча,бу нуқтага Роналдони жойлаштирамиз. Афсуски, фонемен «Интер»да асосан жароҳатини даволашбилан банд бўлди. Унинг атиги 99 та учрашувда майдонга тушиши ҳам шу билан боғлиқ. Шунга қарамай, бразилиялик футболчи клуб сафида 59 та гол киритишга улгуриб қолди. Роналдо футбол оламида жуда кам туғуладиган ноёб истеъдодлардан бири. Шу сабабли, бу рамзий жамоада унинг бўлиши «Интер» мухлисларини фақат ва фақат хурсанд қилади деган умиддамиз.

Хужумчилар

Жузеппе Меацца (Италия)

Бежизга «Интер» ўз уй стадионини ушбу футболчининг номи билан атамаган. Клуб сафига 17 ёшида келган футболчи атиги 40 кг тош босар эди. Унинг қанчалар озғин бўлганини тасаввур қиляпсизми? Шунга қарамай, футболчи клуб тарихидаги энг яхши тўпурар бўлишни уддалай олди. 14 та мавсум «Интер» либосида майдонга тушган ҳужумчи ҳисобида 247 та гол мавжуд бўлиб, бу рекордни ундан тортиб оладиган ҳужумчи ҳали бери топилмаслиги аниқ. Меацца 20-асрдаги «Интер»нинг тимсоли ва юзи сифатида ном қозонган футболчи. Уни бу рўйхатга киритмасликка ҳеч кимнинг ҳақи йўқ!

Мураббий — Эленио Эррера (Франция/Аргентина)

Барча Каттеначо нима эканлигини билади, бироқ унинг асосчиси ким эканлиги билан қизиқмайди. Марҳамат танишинг! Ушбу услуб эгаси Эленио Эррера жаноблари. Айнан у ўйин давомида кескин прессинг қилиш орқали рақибни ўз кучи билан енгишни амалда татбиқ қилган шахс саналади. У ўз даврининг Гвардиоласи эди. 60-йилларда унингбошчилигидаги «Интер»ни енгишнинг иложи бўлмаган. Кейинчалик бутун Италия футболи тадбиқ қилган услуб орқали Эррера бутун Европани забт этишга муваффақ бўлган. 3 та скудетто ва 2 та Европа чемпионалр кубогида ҳам унинг ҳизматлари жуда катта.

Манба: Stadion.uz
Киритилди: 22:55, 10.03.2020.
Ўқилди: 3445 марта.
Фикрлар: 0 та.

Бўлимга тегишли қизиқарли хабарлар

ЭНГ КЎП ЎҚИЛГАН ЯНГИЛИКЛАР

Асосий сахифа
© STADION.UZ
Гувоҳнома №0917. Берилган санаси: 02.12.2013. Муассис: «OSIYO KABEL» МЧЖ. Бош муҳаррир: Бўронов Олимхўжа Азимхўжа ўғли. Таҳририят манзили: 100057, Тошкент шаҳри, Уста Ширин 125. E-mail: admin@stadion.uz
Барча ҳуқуқлар ҳимояланган. Сайт материалларидан тўлиқ ёки қисман фойдаланилганда веб-сайт манзили кўрсатилиши шарт.
Блогдаги материаллар учун блог эгаси, хабарлар остидаги фикрлар учун фойдаланувчининг ўзи жавобгар.