Беларуснинг "Энергетик-БГУ" клуби бош мураббийи Владимир Белявский БАТЭга қарши ўйинда "дубл"га эришган Жасур Яхшибоев ҳақида ўз фикрини билдириб ўтди.

— Яхшибоев учрашувдаги учинчи голни уриб, "хет-трик"ни расмийлаштириши мумкин эди, аммо кўп ўтмай ҳисоб 2:1га ўзгарди. Ғалаба қўлдан чиқишидан хавотир олдингизми?
— Йўқ. Ўтган мавсумдан бошлаб футболчиларнинг имкониятларига шубҳа қилмайман. Улар хато қилиши мумкин. Бу уларнинг ёшига, ҳали ўзаро кам ўйнаганига боғлиқ. Энди улар бир ёшга улғайишди. Улар янги даражага чиқишларини истайман. Уларда иштиёқ юқори.

— Яхшибоев ҳақида нима дея оласиз?
— У савияли ўйинчи. Уни қўлга киритиш борасида узоқ вақт музокара олиб бордик. Таркибимизда яна бир ўзбекистонлик яхши йигит бор. У яқинда касал бўлиб қолди. Уларни кузатиб бордик. Яхшибоев Осиёда таниқли футболчи. Бундай ўйинчи Беларусда йўқ бўлса керак.

— У мавсум охиригача сизнинг жамоангизда ўйнайдими?
— Бизнинг жамоа шундайки, эртага сафимизда бу йигитлар бўлмаслиги мумкин. Бизга шунчаки пул берадиган одамлар йўқ. Муносиб таклифлар тушса, ўйинчиларни сотамиз. Бошқа ўйинчилар қидирамиз. Биз шунинг ҳисобига яшаймиз. Ишимиз шундай иборат.