Ўзбекистонлик футболчи Жасур Яхшибоевнинг Беларусь чемпионатидаги дебюти жуда ажойиб чиқди. Камтаргина «Энергетик-БГУ» клуби ўз майдонида номдор БАТЭни қабул қилиб, кутилмаганда, ҳамюртимизнинг иккита голи эвазига ғалаба қозонди.
Жасур кечаги ўйини билан Беларусь матбуоти эътиборига тушди. "Энергетик-БГУ" - БАТЭ учрашувида Яхшибоевнинг ҳаракатларини by.tribuna.com сайти таҳлил қилди. Уни ўзбек тилига таржима қилган ҳолда эътиборингизга ҳавола қиламиз.
"Ҳеч нарсага қарамай, Беларусь Олий лигаси бошланди. Илк учрашувда «Энергетик-БГУ» ўз уйида БАТЭни қабул қилиб, кўпчилик учун кутилмаганда 3:1 ҳисобида ёрқин ғалабага эришди.
Ғалабага тамал тошини "студентлар"нинг янги футболчиси — «Пахтакор»дан ижарага олинган 22 ёшли Жасур Яхшибоев қўйди. Биринчи ҳолатда барчасини Давид Тве бошлади. У майдон марказида рақибни алдаб ўтиб, ўзбекистонлик футболчига узатма берди. Қолганини Яхшибоевнинг ўзи ҳал қилди. Дастлаб у Захар Волковдан осонлик билан ўтиб кетди ҳамда дарвоза майдони чизиғи олдидаги бир ҳимоячи ва посбон Антон Чичканни чалғитганча бўш дарвозани ишғол қилди.
Орадан 8 дақиқа ўтиб Жасур дублни расмийлаштирди. Жуниор Атеменг ўзи билан Волковни олиб кетди. Натижада Яхшибоев дарваозабон билан яккама-якка вазиятда тўпни дарвоза бурчагига жойлаб қўйди.
Ўзбекистонлик легионернинг «Энергетика-БГУ» сафидаги дебют ўйини Беларусь чемпионатининг ўтган мавсумдаги энг яхши тўпурари Илья Шкуринга нисбатан ҳам яхшироқ таассуроқ қолдирди. Шкурин ўтган йили ўзининг илк голини олтинчи турган келиб «Ислочи» дарвозасига урган бўлса, БАТЭга қарши баҳсда ҳеч нарса кўрсата олмади.
Яхшибоев эса биринчи бўлимнинг ўзида бемалол "хет-трик"ни расмийлаштириши мумкин эди. Баҳснинг 40-дақиқасида у Егор Филипенкони алдаб ўтиб, посбон билан бирга-бир вазиятга чиқиб бориб, зарба берди. Чичкан эса оёғи билан тўпни қайтариб қолди. Ҳужумчи БАТЭга қарши учрашувнинг энг яхши футболчиси деб топилганини таъкидлаш лозим.
Ўзбекистонлик ўйинчининг хислатларига тўхталадиган бўлсак. У юқори бошланғич тезликка эга, рақибни алдашни чўчимайди ва аксарият ҳолатларда бу ишни муваффақиятли амалга оширади. Бундан ташқари, у тўп учун охиригача курашади. Қуйидаги видеони томоша қилинг. Унда Жасур тўпни Дмитрий Бессмертнийга олдирганидан кейин охиригача курашди, гавдаси билан ишлади, оёқда тик турди, тўпни олиб қўйиб, ажойиб узатма билан жамоаси учун хавфли вазиятни юзага келтирди.
Яхшибоев катталар футболида бешинчи мавсумни ўтказмоқда. «Пахтакор» тарбияланувчиси 2018 йилда 27та ўйинда майдонга тушиб, учта гол урди. 2019 йилда эса АГМКга ижарага берилди. Февраль ойида эса «Энергетик-БГУ» уни ижарага олиш борасида келишувга эришди.
"Студентлар" бош мураббийи Владимир Белявскийга Жасурнинг Ўзбекистон олимпия терма жамоаси сафида Осиё чемпионатидаги иштироки ёққан бўлса керак. Ўзбекистон бу мусобақада ярим финалгача етиб борган бўлса, чорак финалда у жамоадоши билан "девор" ўйнаб, БАА дарвозасини ишғол қилди.
