Испаниянинг "Marca" нашри футбол тарихидаги энг яхши футболчини аниқлаш мақсадида мухлислар ўртасидаги сўровномани ўзига хос мусобақа тарзда ўтказди.

Нашр футбол тарихидаги 16 нафар футболчини танлаб олди, уларни қуръа натижасида жуфтликларга тақсимлаган ҳолда плей-офф тарзда мусобақани ташкил этди. "Ювентус" ҳужумчиси Криштиану Роналду ва "Барселона" сардори Лионель Месси финалгача етиб келишди.

Португалиялик футболчи нимчорак финалда Мальдинини (73%-27%), чорак финалда Зиданни (56%-44%) ва ярим финалда Марадонани (59%-41%) "мағлуб" этди.

Аргентиналик футболчи эса 1/8 финал босқичида Пушкаш (78%-22%), чорак финалда Ди Стефанони (70%-30%) катта фарқ билан ортда қолдирган бўлса, ярим финалда у бразилиялик Роналдо устидан кичик фарқ билан ғалаба қозонди — 52%-48%.

Криштиану ва Лионель ўртасидаги финал сўровномасида Роналду 54% (246 минг) овоз тўплаб, ғолибликни қўлга киритди. Мессига эса 209 минг мухлис овоз берди (46%).

"Бронза" учун ўтказилган сўровда эса Роналдо Марадонани мағлуб этди — 51%-49%. Бразилиялик собиқ футболчи чорак финалда афсонавий Пелени ортда қолдиргани эътиборга молик.