«Тоттенҳэм» клубининг шарқий Европа ва МДҲ мамлакатларидаги махсус вакили Роман Дубов коронавирус сабаб тўхтаб қолган Англия чемпионатининг давом эттирилиши қанчалик муҳим экани ҳақида гапирди.

«Яқинда Буюк Британияда The Athletics нашри тахминий йўқотишларни ҳисоблаб чиқди. Ҳозирда телеҳуқуқлардан йўқотиладиган пулнинг ўзи 762 миллион фунтни ташкил қилмоқда. Шунингдек, ўйин кунларидан тушадиган 250 миллион, тижорат ҳамкорликларидан келадиган 200—250 миллион қўшилса рақам 1,3 миллиард фунтни ташкил қилмоқда. Агар чемпионат охиригача ўйнаб қўйилмаса бу АПЛ клублари учун фалокат бўлади.

Бироқ бу олдиндан маълум бўлган ва тўғридан-тўғри йўқотиладиган пуллар. Апрель ва май ойларида клублар келаси мавсум даромад манбаларини кўриб чиқади, ҳомий ва ҳамкорлар сони ҳисоблаб чиқилади. Мазкур йўқотишларни ҳозирча тасаввур қилиш қийин. Мавсум якунланмай қолса зарарларни қоплашнинг иложи бўлмайди. Клублар мавсум давомида маошларга 1,9 миллиард сарфлайди. Футболчилар маоши 30 фоизга қисқарган тақдирда ҳам бу АПЛни қутқариб қололмайди.

«Борнмут», «Вулверҳэмптон» ёки «Норвич» каби бюджети камтарона клублар даромадининг 90 фоизи телеҳуқуқлар савдосидан келади. Умуман кўплаб клублар бюджети ТВ-трансляцияларга боғлиқ. Фақатгина кучли олтилик жамоалари («Тоттенҳэм», «Ливерпуль», «Манчестер Юнайтед», «Манчестер Сити», «Челси», «Арсенал») бундан мустасно. Масалан «Тоттенҳэм»да ТВ-шартномалар умумий даромаднинг 50 фоизини ташкил этади. Олтиликдан ташқари жамоаларда эса бу кўрсаткич 70—85 фоизга тенг. Агар бу пуллар бўлмаса кўп жамоалар оғир аҳволга тушиб қолади.

Шу сабаб чемпионат жорий мавсуми охиригача ўтказилади. Савол у қандай кўринишда ўтказилишида. Балки, фақат телевидениени ўйлаб, томошабинларсиз бўлиб ўтар. Ўшанда ҳеч бўлмаса 760 миллион фунтни қутқариб қолиш мумкин. Ҳозирда ўйинларни Лондон ва Мидлендсдаги ёпиқ ҳудудларда ўтказиш масаласи кўриляпти. Жамоалар ҳар уч кунда бир марта ўйин ўтказади ва чемпионатни бир ой ичида тугатишга ҳаракат қилишади», — дейди россиялик мутасадди.