Stadion.uz яқиндагина афсонавий Ривалдо ҳақида Soccer нашри эълон қилган мақолани ўқувчиларимизга тақдим этади.
Яқиндагина ўзининг 43 ёшини қоралаган бразилиялик “абадий дарбадар” Ривалдо ҳақидаги қизиқарли маълумотлар, футболчининг иқтибослари ва эришган ютуқлари билан таништириб ўтамиз.
Ривалдонинг фаолиятидаги 10 та муҳим клуб
1. “Можо-Мирин” Сан-Паули штатидаги мўъжазгина клуб Ривалдо учун чинакам трамплин вазифасини ўтаб бергани билан жуда машҳур. Бундан ташқари, қаҳрамонимиз ўзининг сўнгги мавсумини ҳам айнан шу клубда жамоа сардори сифатида ўтказган. 43 ёшида ҳам “Можо-Мирин” учун фойда келтиришга қодир “маэстро”га қойил қолмасликнинг иложи йўқ.
2. “Коринтианс” жамоаси скаутлари ярим ҳимоячини 20 ёшга қадам қўйган чоғида “халқ жамоаси”га таклиф қилишган. Эътиборли шундаки, “Можо-Мирин” ўз тарбияланувчисини аввалига бир мавсумга ижарага беради. Кейин эса, “Коринтианс”дан унинг трансфери учун 4 миллион талаб қилади. “халқ жамоаси” Ривалдо учун пул тежашга уринаётган бир пайтда...
3. “Палмейрас” клуби катта саҳнага чиқади ва клуб истаган суммани 3 соатда тўлаб ёш иқтидор эгасини қўлга киритади. Ривалдо ҳам “Палмейрас”да чинакамига ўзини кўрсатишни бошлайди. У профессионал футболдаги энг ажойиб мавсумларини айнан шу клуб сафида ўтказишни бошлаган десак, адашмаган бўламиз. Икки бор штат чемпионлиги ва якунда Бразилия чемпионлигини қўлга киритган футболчини “Палмейрас” 4 баробар қимматроқ нархга сотиб юборишга қарор қилади.
4. “Депортиво” Ривалдонинг Европада биринчи клуби сифатида тарихда қолди. Қаҳрамонимиз Ла-Каруняда атиги бир мавсум қолганига қарамай 41 та учрашувда 21 та гол киритишга муваффақ бўлди. “Депортиво” чемпионатда “Реал Мадрид” ва “Барселона”дан кейин 3-ўринни эгаллаган бўлса, қаҳрамонимиз келаси мавсумни Каталония клубида бошлайдиган бўлди.
5. “Барселона” Ривалдонинг карьераси энг пик нуқтага кўтарилганида уни ўз жамоасига оғдириб олгани таҳсинга сазовор. 235 та учрашув 130 та гол! 1999-йилдаги “Олтин тўп” соврини ва 4 та соврин. Тўғри, Ривалдо Каталонияда совринлар қуршовида қолиб кетмади, бироқ унинг Фигу билан бирга ҳосил қилган тандемини ҳалигача мухлислар яхши хотирлашади.
6. “Милан” сафига Ривалдо Осиё қитъасида бўлиб ўтган мундиал ғолиби сифатида ташриф буюрди. 30 ёшли футболчидан “россонери” чинакамига “мўъжиза” кутишгани рост. Қайсидир маънода қаҳрамонимиз ўзининг илк мавсумида буни намойиш этди, бироқ кейин захира ўриндиғига михланиб қолди.
7. “Олимпиакос” сафига келиб қўшилганида ундан фурор кутишмаган бўлсада, у буни кўрсата олди. Грецияда 40 дан ортиқ гол киритишга муваффақ бўлган Витор Борба Феррейра “Олимпиакос”ни мухлислар ёқимтойи сифатида тарк этди.
8. “Бунёдкор” сафига унинг келиб қўшилиши Тошкент клубининг энг гуллаган даврларига тўғри келади. Тўғри, айни дамда жамоа аввалги даражада қудратга эга эмас, бироқ бу клуб бугунги кунда ўзбек футболига иқтидорлар етказиб бериш билан шуғулланмоқда. Бундан ташқари, “қалдирғочлар”нитаниқли мураббий Вадим Абрамов бошқармоқда. У,шунингдек,миллий жамоа бош мураббийи ҳам саналади. Ривалдо Тошкентда икки мавсум тўп сурди. Ички биринчиликда барча мусобақаларда ғолиб чиқди. ОЧЛ ярим финалига қадар етиб борди. Унинг Сколари билан тандемда ишлагани ҳалигача ўзбек футболидаги энг ёрқин хотира саналади.
9. “Кабушкорп” ҳақида эшитганмисиз? Анголада шундай клуб бор. Ривалдо Ангола чемпионатида ёрқин ва ёқимли хотиралар қолдирди. Футболчининг айтишича, Анголада деярли 99 фоиз мухлис клубнинг эмас, айнан унинг ўйинини томоша қилиш учун стадионга ташриф буюрган экан.
10. Бразилия терма жамоаси либосида 73 та ўйинда майдонга тушган Витор Феррейра ўзининг 34 та голи билан мухлисларга қувонч улашган. 10 йил(1993-2003) давомида терма жамоадан мунтазам чақирув олган қаҳрамонимиз 2002-йилда ЖЧ олтин медалларини қўлга киртибгина қолмай, Конфедерациялар кубоги ва Копа Америкада ҳам зафар қучган. Айниқса, унинг 2002-йилдаги ЖЧда киритган 5 та голи ва Туркия терма жамоасига қарши ишлатган симулияцияси ҳалигача эсланади.
Нима учун Ривалдонинг ҳаёти жуда таъсирли? 5 та факт
- Жуда қийинчиликда катта бўлган болакайнинг профессионал тарзда футбол шуғулланишини ҳеч ким тасаввур ҳам қилмаган бўлса, ажаб эмас. Оғир ўтган болалик туфайли Ривалдонинг оғзидаги тишлари ҳам тўкилиб кетган. Унинг витамин етишмовчилиги сабабли ҳунук гавдаси доимо атрофдагиларда кулгу уйғотган. Энг ачинарлисишундаки, у 15 ёшида отасидан ажралган.
2. Интилувчанлик борасида ҳеч ким у билан беллаша олмаслиги аниқ. У футбол билан шуғулланаётган чоғида йўл ҳақи учун пули бўлмаган. Оқибатда, 15 км масофани пиёда босиб ўтганча машғулотларга қатнашга тўғри келган.
3. Унга ҳеч ким ишонмагани табиий ҳол. Витор жуда нимжон ва носоғлом бола бўлгани боис, унинг 90 дақиқа югура олишига ҳеч ким ишонмаган. У ўзини ўзи оёққа қўйган кам сонли футболчилардан бири саналади.
4. У қайси клубда тўп сурмасин, мухлисларнинг ёқимтойи бўлишни уддалаган. Бундан ташқари, у ўз даврининг энг зўр футболчиси бўлишга ва камдан-кам футболчиларга насиб этувчи “зўрларнинг зўри” унвонини қўлга киритган. Унинг “Валенсия”га қарши учрашувда киритган ўзи сингари афсонавий голига эътибор қаратинг:
5. Унинг ўғли Ривалдиньо билан бир жамоада тўп сурганидан хабарингиз борми? Ота-болалар “Можо-Мирин” сафида нафақат бирга тўп суришган, ҳатто бир учрашувда биттадан гол киритишга ҳам муваффақ бўлишган.
Барча қийинчиликларни енгиб ўтган, ҳаётнинг оғир болалик тақдим этишига қарамай ўзи суйган футбол билан охиригача шуғулланган Ривалдодан 5 та иқтибос.
Эришган ютуқлари ҳақида
Мен ўз меҳнатсеварлигим сабабли ҳаётда нимагадир эришишга муваффақ бўлдим. Футболдаги барча ютуқларим ортида худонинг меҳри мавжуд. Айнан у менга доимо тўғри йўлни кўрсатган. Мен оч, камбағал болакай эдим. Энди эса, Жаҳон чемпиони ва “олтин тўп”ни қўлга киритган футболчиман.
Очлик ҳақида
Менинг ёшлигим очлик билан уйғунликда ўтган. Кўрган қийинчиликларимни ҳеч қачон унутмайман. Бу ҳаётнинг менга берган синовини, аслида ким бўлганимни унутишга ҳаққим йўқ.
Нима билан фахрланади?
Мен Бразилия терма жамоаси сафида 10-рақамда ҳаркат қилганимдан ва ЖЧ учрашувларининг 14 тасида 8 та гол киритганим билангина фахрланаман. Қолган ютуқларим фахрланишга арзимайди.
Оила
Оиласийўқ инсон ҳаётда ҳеч нарсадан завқ олишга қодир эмас. Менга доимо оилам керак. Улар билан ҳаётнинг турли совғаларини баҳам кўришни, доимо уларнинг илиқ тафтини ҳис этишни истайман.
Футболчилик сири ҳақида
Қандай қилиб фаолиятим давомида 250 та гол киритдим? Мен ҳеч қачон майдонда гол киритиш ҳақида ўйламаганман. Шунчаки, ўйиндан лаззат олишни истаганман холос. Бўлди шунинг ўзи. Шунга қарамай, гол киритиш завқли эканини яшириб ўтирмайман.
