«АЗ Алкмаар» клуби Нидерландия чемпионати муддатидан олдин бекор қилингани юзасидан баёнот берди. Клуб Европа чемпионлар лигаси тақсимоти юзасидан ўз норозилигини билдирди. Эслатиб ўтамиз, Нидерландия футбол федерацияси қарорига кўра, жадвалда 2-ўринни эгаллаб турган "АЗ" ЕЧЛнинг иккинчи босқичида иштирок этадиган бўлди.

«Бир неча ҳафта давомида ҳозир биз тушиб қолган вазиятдан чиқиб кетиш учун бир нечта сценарийларни ишлаб чиқдик. Аммо бизнинг таклифларимиз жавобсиз қолди. Биз Чемпионлар лигаси йўлланмаси тақсимотига рози эмасмиз. Ушбу қарордан ҳафсаламиз пир бўлди», – дея «АЗ» бош директори Роберт Эйнхорннинг сўзларидан иқтибос келтирди клуб расмий сайти.

Мамлакат футбол федерацияси қарорига кўра, Чемпионлар лигасининг кейинги мавсумида «Аякс» плей-офф босқичида, "АЗ Алкмаар" эса саралашнинг иккинчи босқичида иштирок этади.

Чемпионат тўхтатилган пайтда «Аякс» ва "АЗ Алкмаар" клублари 56 очко билан пешқадамлик қилишаётган эди. Амстрдамликлар қўшимча кўрсаткичлар бўйича 1-ўринни эгаллаб туришган эди.