«Барселона» клуби собиқ президенти Жоан Лапорта 2021 йилда клуб раҳбарлиги учун курашда ўз номзодини қўймоқчи эканини тасдиқлади. Шунингдек, у сайловда ғолиб чиқса, жамоа бош мураббийи лавозимига Хосеп Гвардиолани олиб келмоқчи.

«Мен Гвардиоланинг жамоага қайтишини истардим. Аммо у ҳозир «Манчестер Сити»да. Якуний қарорни Хосепнинг ўзи қабул қилиши керак. У — «Барселона» учун эталон ҳисобланади, кўпгина каталонияликлар унинг жамоа бошқарувига қайтишини исташмоқда.

Хави? У мураббийга айланди ва футбол билан яшашда давом этмоқда. У клубга қайтиш учун қулай вазият қачон келишини кутиши керак. 2021 йилда унинг собиқ жамоадошлари ўйнаётган бўлади. Улар билан ишлаш осон бўлмайди. Хави — ҳалол инсон. У футболда кўп нарсани билади ва тўғри қарор қабул қилади. У «Барселона» бошқарувига қачон келишни ўзи ҳал қилади", — деди Лапорта.

Лапорта 2003-2010 йилларда «Барселона» президенти лавозимида ишлаган. 2015 йилги сайловда эса у Хосеп Бартомеуга ютқазган. Лапорта бошқаруви пайтида "кўк-анорранглилар" клублар ўртасидаги ЖЧ, 2 марта Чемпионлар лигаси, 4 марта Испания Ла лигаси, 3 марта марта мамлакат суперкубоги ва бир марта Испания кубогида ғолиб чиқди.