ОФКнинг Жанубий ва Марказий минтақалардаги аъзо ассоциациялари бош котиблари учун ташкил этилган онлайн конференцияси ўз ишини якунлади. Ҳар йили ташкил этиладиган ушбу конференцияда бу йил ОФКнинг минтақавий ассоциациялари раҳбарлари ҳам қатнашди.

Жумладан, мазкур конференцияда Ўзбекистон футбол ассоциацияси бош котиби Аваз Максумов ҳам иштирок этди.

Биринчи бор онлайн тарзда ўтказилган йиллик конференцияда Осиё футболи ривожи йўлида ОФКга аъзо мамлакатлар футбол ассоциациялари ўртасидаги шериклик алоқаларни янада мустаҳкамлаш масалалари, шунингдек жаҳонда юзага келган вазиятнинг Осиё футболига салбий таъсири ва унинг ижобий ечимлари кенг муҳокама этилди.

Шу билан бирга, қитъа футбол уюшмаси томонидан амалга ошириладиган дастур, лойиҳа ҳамда ташаббуслар бўйича янада тўлиқроқ маълумот берилди. Хусусан, Конфедерациянинг тузилмасига яқинда қўшилган иккита функция – тижорат ва хавфсизлик масалалари ҳақида ҳам керакли маълумотлар алмашилди.

Бундан ташқари, ҳозирги қийин шароитда ҳам спорт ва ахлоқий меъёрларни таъминлаш, келишилган ўйинларга қарши курашиш тизимини янада такомиллаштириш зарур эканлигига урғу берилди, шунингдек болалар ва ёшларни ҳимоя қилиш ҳам диққат марказида бўлди.

Конференция Руминия футбол федерацияси президенти (меҳмон спикер) Разван Бурлеанунинг футболни ривожлантиришнинг стратегик ёндашуви тўғрисидаги тақдимоти билан якунланди.

Энди онлайн конференция Шарқий минтақадаги бош котиблар учун 11-июн куни бўлиб ўтса, 25-июн куни Жануби-шарқий зонада ўтказилади. 30-июн куни эса якуний конференция Ғарбий минтақада ташкил этилади.