Испания чемпионатининг 34-тури доирасида "Барселона" клуби жадвалда 5-ўринни эгаллаб турган "Вильярреал" меҳмони бўлиб, ишончли ғалабани қўлга киритди.

Меҳмонлар 3-дақиқадаёқ ҳисобни очишга муваффақ бўлишди. Альба чап қанотдан жарима майдонига ёриб кириб, дарвоза олдидаги Гризманнга узатма берди. Аммо ҳимоячи Пау Торрес  тўпни ўз дарвозасига буриб юборди.

Учрашувнинг 14-дақиқасида эса "Вильярреал" яхши ҳужум ташкил қилди. Санти Касорланинг зарбасидан кейин Тер Штеген тўпни қайтарди. Жерар Морено эса 7-8 метрлардан дарвозани ишғол қилди.

Орадан 6 дақиқа ўтиб Мессининг узатмасидан кейин Луис Суарес 17 метрлардан айланма зарба билан дарвозани забт этди. Биринчи бўлимнинг сўнгги дақиқада эса Лео тўпни товони билан Гризманнга қолдирди. Антуан 16 метрлардан "парашют" зарба бериб, супергол муаллифига айланди — 1:3.

"Барселона" иккинчи бўлимни анча хотиржам ўтказди. Шунга қарамай, каталонияликлар бир нечта хавфли вазиятлар яратишди. "Вильярреал" посбони Асенхо иккинчи таймда анча ишончли ҳаракат қилди. "Барса"нинг чиройли комбинациясидан кейин Месси томонидан урилган гол эса VAR ёрдамида бекор қилинди (офсайд).

Иккинчи бўлимнинг асосий вақти тугашига 3 дақиқа қолганида Ансу Фати индивидуал маҳорати эвазига "Барса"нинг тўртинчи голини "сариқ сувости кемаси" дарвозасига жойлади. Қўшиб берилган дақиқаларда эса Месси томонидан йўлланган жарима зарбасидан кейин тўп тўсинга тегиб қайтди. Қайтган тўпга Брэйтуэйт бош билан зарба берди. Асенхо уриб юборишга муваффақ бўлди.

Шу тариқа, "Барселона" кетма-кет иккита дурангдан кейин йирик ҳисобда ғалаба қозониб, "Реал" билан 4 очколик фарқни сақлаб қолди. Жамоа кейинги турни 8 июль куни ўз майдонида "Эспаньол"га қарши ўтказади.

Испания Ла лигаси, 34-тур
Вильярреал – Барселона 1:4 (1:3)
Голлар: 0:1 – 3, автогол Пау Торрес, 1:1 – 14 Жерар Морено, 1:2 – 20 Суарес, 1:3 – 45 Гризманн, 1:4 – 86 Фати.
Вильярреал – Асенхо, Альберто Морено, Альбиоль, Марио Гаспар, Пау Торрес, Касорла (Тригерос, 56), Иборра (Сориано, 46), Замбо-Ангисса, Чуквуэзе, Пако Алькасер (Бакка, 36; Ниньо, 70), Жерар Морено (Мойсес Гомес, 46).
Барселона – тер Стеген, Семеду (Ракитич, 60), Пике (Араухо, 82), Лангле, Серджи Роберто, Видаль, Бускетс (Брэйтуэйт, 73), Альба, Месси, Гризманн (Фати, 72), Суарес (Пуч, 60).
Огоҳлантириш: Пау Торрес (17).