Англия чемпионатининг 35-тури доирасида «Манчестер Юнайтед» ўз майдонида «Саутгемптон»ни қабул қилиб, сўнгги дақиқаларда тайёр ғалабани қўлдан чиқарди.

Меҳмонлар баҳснинг 12-дақиқасида Стюарт Армстронг томонидан урилган гол эвазига ҳисобни очишди. Майдон эгалари тезда ўзларига келиб олиб, нафақат мувозанатни тиклашди, балки олдинга ҳам ўтиб олишди.

Дастлаб Марсиал жарима майдони ичида тўпни қабул қилдию, амаллаб қулай вазиятда турган Рэшфорд томон пас берди. Маркус эса аниқ зарба билан дарвозани ишғол қилди. Орадан 3 дақиқа ўтиб Марсиал индивидуал маҳорат эвазига рақиб жарима майдонига кириб келиб, тўпни дарвозага жойлади.

Иккинчи бўлим ўрталаригача устунлик Сульшер жамоаси томонида бўлди. Жумладан, Марсиал ва Рэшфорд гол уриш учун яна имкониятлар бўлди, аммо улар вазиятларни голга айлантира олишмади.

Сўнгги дақиқаларда эса "Саутгемптон" рақиб дарвозаси томон босим уюштирди. Бир вазиятда Давид де Хеа сэйв намойиш этган бўлса, иккинчи таймга қўшиб берилган 6-дақиқада меҳмонлар бурчак зарбасидан кейин дарвозани ишғол қилишди.

Мазкур дуранг туфайли "МЮ" очколари (59) бўйича "Лестер"га етиб олди. Аммо тўплар фарқи "тулкилар"да яхшироқ бўлгани учун "Юнайтед" 5-поғонада қолди. Европа чемпионлар лигаси йўлланмаси тақдири катта эҳтимол билан сўнгги турда бўладиган "Лестер" - "Манчестер Юнайтед" ўйинида ҳал бўлади.
 
АПЛ, 35-тур
Манчестер Юнайтед – Саутгемптон 2:2 (2:1, 0:1)
Голлар: 0:1 – 12 Армстронг, 1:1 – 20 Рэшфорд, 2:1 – 23 Марсьяль, 2:2 – 90+6 Обафеми.
Манчестер Юнайтед – Де Хеа, Уан-Биссака, Шоу (Уильямс, 75), Магуайр, Линделеф, Погба (Фред, 63), Бруну Фернандеш (Мактомини, 84), Матич, Марсьяль, Гринвуд (Жеймс, 84), Рэшфорд.
Саутгемптон – Маккарти, Стивенс, Беднарек, Уокер-Питерс, Бертран, Ромеу (Обафеми, 87), Армстронг (Смоллбоун, 69), Уорд-Проуз, Редмонд, Адамс (Лонг, 64), Ингз.
Огоҳлантиришлар: Уорд-Проуз (44), Стивенс (53), Уокер-Питерс (56), Уан-Биссака (90).