«Манчестер Юнайтед» клуби Англия Премьер Лигасининг 36-турида «Кристал Пэлас»ни мағлубиятга учратди (2:0).

Оле-Гуннар Сульшер қўл остидаги жамоа барча мусобақаларда кетма-кет 19 ўйиндан буён мағлубият нималигини билмаяпти (14 ғалаба, 5 дуранг).

Бу эса «Манчестер Юнайтед» учун 2010 йилдан кейинги энг узун мағлубиятсиз серия ҳисобланади. Ўшанда Алекс Фергюсон бошчилигидаги жамоа апрелдан ноябрь ойига қадар кетма-кет 29 ўйинда мағлуб бўлмаганди.

«Манчестер Юнайтед» кейинги ўйинни 19 июль, якшанба куни ўтказади. Жамоа Англия Кубоги ярим финалида «Челси» билан ўйнайди.