Бразилиялик собиқ футболчи Ривалдо "France Football" журналининг 2020 йилда "Олтин тўп" ғолибини аниқламаслик ҳақидаги қарорига ўз муносабатини билдирди.

«Ҳозир жаҳондаги ҳолатни инобатга олганда, бу тўғри қарор бўлди. Европа миллий чемпионатларида мавсум ғалати ўтди — баъзи лигалар мухлисларсиз ўтган бўлса, баъзилари, масалан, Франция чемпионати муддатидан аввал якунланди.

Бу қарордан баъзи футболчиларнинг ҳафсаласи пир бўлган бўлса керак. Масалан, Роберт Левандовски — шубҳасиз, улардан бири. Польшалик футболчи мавсумни ажойиб ўтказди. У «Бавария» билан Бундеслигада саккизинчи совринини қўлга киритган бўлса, жамоани олдинда Чемпионлар лигаси кутиб турибди. Шу боис, унда Месси ва Роналду билан соврин учун курашиш имконияти мавжуд эди.

Месси ва Роналду учун эса «Олтин тўп»нинг бекор қилиниши — яна битта совринни ютиш учун қўлдан чиқарилган имконият, айниқса, уларнинг фаолияти якунига етаётганини инобатга олганда», — деди Ривалдо "Marca" нашрига берган интервьюсида.