Франция кубоги финали доирасида «ПСЖ» ва «Сент-Этьен» клублари «Стад де Франс»да тўқнаш келишди. Учрашув парижликларнинг кичик ҳисобдаги ғалаба билан якунланди.

Баҳснинг 14-дақиқасида Неймар ҳисобни очишга муваффақ бўлди. 31-дақиқага келиб эса «Сент-Этьен» ҳимоячиси Перрен "ПСЖ" ҳужумчиси Мбаппега нисбатан ишлатилган фол учун майдондан четлатилди. Килиан ҳам ўйинни бошқа давом эттира олмади.

Парижликлар бир соат давомида бир киши кўп бўлиб ўйнаганига қарамай, ўйиннинг қолган қисмида ҳисоб бошқа ўзгармади.

Шу тариқа, "Пари Сен-Жермен" ўз тарихида 13-марта Франция кубогини қўлга киритди. Бу рекорд натижа ҳисобланади. «Марсель» ҳисобида 10та соврин мавжуд.

«ПСЖ» кетма-кет тўртинчи марта ҳам чемпионат, ҳам Кубокда ғалаба қозониб, олтин дублни расмийлаштирди. Жамоа бу борада Франция рекордини такрорлади. «Сент-Этьен» ҳисобида ҳам 4та олтин дубл бор.

Франция кубоги, Финал
ПСЖ – Сент-Этьен 1:0 (1:0, 0:0)
Гол: 1:0 – 14 Неймар.
ПСЖ – Навас, Керер (Дагба, 20), Маркиньос, Тиаго Силва, Баккер, Гуйе, Ди Мария, Паредес (Верратти, 75), Икарди, Мбаппе (Сарабия, 33), Неймар.
Сент-Этьен – Мулен, Колодзейчак, Перрен, Дебюши (Крассо, 83), Масон (Мукуди, 34), Мвила, Камара (Неу Нупа, 46), Будебуз (Норден, 75), Буанга, Амума (Хазри, 46), Фофана.
Огоҳлантиришлар: Масон (2), Баккер (29), Паредес (29), Амума (29), Мулен (29), Верратти (31), Маркиньос (35), Камара (37), Мвила (51), Фофана (90).
Четлатиш: Перрен (31).