Туриннинг "Ювентус" клуби раҳбарияти жамоа бош мураббийи Маурицио Саррини истеъфога чиқариш ҳақида ўйламаяпти. Бу ҳақда клуб спорт диреткори Фабио Паратичи баёнот берди.
"Сарри жамоа ЕЧЛда "Лион"дан мағлубиятга учраса истеъфога чиқариладими? Бутун мавсумни битта учрашув билан баҳоламаслик керак. Скудетто - бу ҳар доим ажойиб натижа, чемпионатда кетма-кет тўққиз марта ғалаба қозониш эса - ақлбовар қилмас натижа. Шунинг учун, келинглар қийин ва машаққатли меҳнат натижасида қўлга киритилган ғалабаларни қадрлайлик", - Паратичининг сўзларидан иқтибос келтирмоқда Football Italia.
61 ёшли Сарри "Кекса синьора"ни ўтган йилнинг июнь ойида қабул қилиб олган ва уч йиллик шартнома имзолаган.
"Ювентус" - "Лион" жамоалари ўртасидаги учрашув 7 август куни бўлиб ўтади. Дастлабки учрашувда францияликлар 1:0 ҳисобида ғалаба қозонган.
