Лиссабонда Европа чемпионлар лигасининг "саккиз финалчи" деб номланган мини-турнири давом этмоқда. Бугун бўлиб ўтган чорак финалнинг иккинчи учрашувида кутилмаган натижа қайд этилди.

Нимчорак финалда "Ливерпуль" устидан ғалаба қозонган "Атлетико" клуби, Германия чемпионатининг жорий мавсумида 3-ўринни эгаллаган "Лейпциг"га имкониятни бой бериб қўйди.

Биринчи бўлимда жамоалар фаол ҳаракат қилишганига қарамай, танаффусга қадар ҳисоб очилмади.

Иккинчи бўлим бошида эса германияликларнинг комбинацияси самарали чиқди: ўнг қанотдан етказилган узатмани Ольмо бош билан дарвозага буриб юборди.

Диего Симеоне майдонга Жоау Феликсни ташлади. Ярим ҳимоячи 70-дақиқада пенальти ишлади ва унинг ўзи 11 метрли жарима зарбасидан ҳисобни тенглаштирди.

Баҳс тугашига 2 дақиқа қолганида Тайлер Адамс жарима майдони остонасидан зарба берди. Тўп эса йўл-йўлакай "Атлетико" ҳимоячисига тегиб ўз йўналишини ўзгартирди ва тўрга бориб тушди.

Шу тариқа, 33 ёшли Нагельсман шогирдлари ярим финал йўлланмасини қўлга киритишди. "Лейпциг" финал йўлланмаси учун "ПСЖ"га қарши майдонга чиқади.

Европа чемпионлар лигаси, чорак финал
РБ Лейпциг Германия – Атлетико Испания 2:1 (0:0, 2:1)
Голлар: 1:0 – 50 Ольмо, 1:1 – 71, пенальти Жоау Феликс, 2:1 – 88 Адамс.
РБ Лейпциг – Гулачи, Хальстенберг, Клостерманн, Упамекано, Анхелиньо, Кампль, Забитцер (Мукиеле, 90), Нкунку (Айдара, 83), Лаймер (Адамс, 72), Ольмо (Шик, 83), Поульсен.
Атлетико – Облак, Лоди, Хименес, Триппьер, Савич, Эррера (Жоау Феликс, 58), Коке (Фелипе, 90), Сауль, Феррейра Карраско, Льоренте, Диего Коста (Мората, 72).
Огоҳлантиришлар: Лоди (62), Клостерманн (70), Кампль (82), Айдара (87), Хименес (90).