Ўтган мавсумда "Андижон" жамоасида тўп сурган маҳаллий ҳужумчи Шаҳбоз Жумабоев жорий йил яна жамоамизга қайтди.

- Шаҳбоз, маълум муддатли танаффусдан кейин машғулотларда иштирок этишда қийинчиликлар бўлмаяптими?

- Йўқ, машғулотларни бошлаш қийин бўлмади. Чунки, жамоа таркибидаги аксарият футболчилар билан илгари бирга ўйнаганмиз ва тил топишиб кетишда муаммо бўлмади. Машғулотларда астойдил ишлаяпман. Берилган имкониятдан унумли фойдаланиб, раҳбарият ва мураббийлар штаби ишончини қозониш ниятидаман. Шу фурсатдан фойдаланиб, Маъруфжон Абдусаломовга каттакон раҳмат айтаман.

- Янги бош мураббий ҳақида қандай фикрдасиз?

- Виктор Кумиков тажрибали мураббий саналади. Машғулотлари ранг-баранглиги футболчиларни хурсанд қилмоқда. Ишонаманки, Виктор Балютович "Андижон" жамоасини ижобий натижалар сари етаклай олади.

- Маълум муддат жамоа сафида бўлмадингиз.

- Ҳа, айрим сабабларга кўра, ярим мавсум жамоа билан бирга бўлмадим. Лекин шунга қарамасдан, спорт формамни ушлаб туриш учун якка тартибда машғулотларни ўтказиб турдим.

- "Андижон" жамоаси мухлислари тилакларингиз.

- Исталган инсон билан тортишиш мумкин: "Андижон" мухлислари мамлакатимизда биринчи ўринда туради. Жамоанинг яхши ва ёмон кунларида, муваффақиятсиз ўйинларида ҳам тинимсиз қўллаб-қувватлаб туришади. Барча мухлисларимизга фақат ва фақат яхшиликларни тилайман! Худо хоҳласа, омадли ўйинларимиз билан минглаб мухлисларимизни хурсанд қиламиз.