O‘tgan mavsumda "Andijon" jamoasida to‘p surgan mahalliy hujumchi Shahboz Jumaboyev joriy yil yana jamoamizga qaytdi.

- Shahboz, ma’lum muddatli tanaffusdan keyin mashg‘ulotlarda ishtirok etishda qiyinchiliklar bo‘lmayaptimi?

- Yo‘q, mashg‘ulotlarni boshlash qiyin bo‘lmadi. Chunki, jamoa tarkibidagi aksariyat futbolchilar bilan ilgari birga o‘ynaganmiz va til topishib ketishda muammo bo‘lmadi. Mashg‘ulotlarda astoydil ishlayapman. Berilgan imkoniyatdan unumli foydalanib, rahbariyat va murabbiylar shtabi ishonchini qozonish niyatidaman. Shu fursatdan foydalanib, Ma’rufjon Abdusalomovga kattakon rahmat aytaman.

- Yangi bosh murabbiy haqida qanday fikrdasiz?

- Viktor Kumikov tajribali murabbiy sanaladi. Mashg‘ulotlari rang-barangligi futbolchilarni xursand qilmoqda. Ishonamanki, Viktor Balyutovich "Andijon" jamoasini ijobiy natijalar sari yetaklay oladi.

- Ma’lum muddat jamoa safida bo‘lmadingiz.

- Ha, ayrim sabablarga ko‘ra, yarim mavsum jamoa bilan birga bo‘lmadim. Lekin shunga qaramasdan, sport formamni ushlab turish uchun yakka tartibda mashg‘ulotlarni o‘tkazib turdim.

- "Andijon" jamoasi muxlislari tilaklaringiz.

- Istalgan inson bilan tortishish mumkin: "Andijon" muxlislari mamlakatimizda birinchi o‘rinda turadi. Jamoaning yaxshi va yomon kunlarida, muvaffaqiyatsiz o‘yinlarida ham tinimsiz qo‘llab-quvvatlab turishadi. Barcha muxlislarimizga faqat va faqat yaxshiliklarni tilayman! Xudo xohlasa, omadli o‘yinlarimiz bilan minglab muxlislarimizni xursand qilamiz.