Ушбу рукнимиздаги энг сўнгги янгиликлар билан таништиришда давом этамиз.
Смолинг қайтадими?
Aнглиянинг “Манчестер Юнайтед” клуби ҳимоячиси Крис Смоллинг ўз фаолиятини “Лестер”да давом эттириши мумкин.
ҳимоячи бу мавсумни “Рома” сафида ўтказди ва 30 та ўйинда майдонга тушди. “Манчестер Юнайтед” ижарадаги футболчисини ортга қайтариш ниятида эмас, шу сабабли унинг трансфери борасида исталган таклифни кўриб чиқишга тайёр.
“The Sun” нашри берган маълумотларга қараганда, Смоллинг билан “тулкилар” шартнома тузиш ниятида.
Манбанинг маълум қилишича, “тулкилар” Крис учун 25 миллион евро таклиф қилмоқчи.
“Вердер” Чонгни қўлга киритадими?
Манчестернинг “Манчестер Юнайтед” жамоаси ярим ҳимоячиси Таит Чонг фаолиятини “Вердер” клубида давом эттиради.
Бу ҳақида “Bild” нашри маълум қилмоқда. Манбанинг маълум қилишича, “мусиқачилар” Чонгни бир мавсумга ижарага олишни режалаштирган.
Маълумотларга қараганда, Бремен клуби 20 ёшли футболчини сотиб олиш ҳуқуқини қўлга кирита олмади.
“Рома” уни сотишга тайёр
Римнинг “Рома” клуби ўз ҳужумчиси Эдин Жеко борасида исталган таклифни кўриб чиқишга тайёр эканлигини расман маълум қилди.
“Calciomercato” нашрининг маълум қилишича, “бўрилар” ўз ҳужумчисини 15 миллион евро эвазига сотиб юборишга тайёр.
Манбанинг маълум қилишича, Жеко билан “Интер” ва “Ювентус” клублари жиддий қизиқиб қолган. Босниялик ҳужумчи ортда қолган мавсумда 35 та ўйинда майдонга тушди ва ўз ҳисобига 16 та гол + 11 та ассистни ёздириб қўйди.
ПСЖ ҳужумчи изламоқда
Парижнинг ПСЖ клуби жамоани тарк этган Эдинсон Каванини ўрнини эгаллашга қодир ҳужумчи излашни бошлаб юборди.
“Footmercato”нинг маълум қилишича, парижликлар нишонида “қизил иблислар” форворди Одион Игало турибди.
Манбанинг маълум қилишича, “қизил иблислар”да ижара асосида тўп суараётган футболчининг трансфери борасида ПСЖ “Шанхай Шенхуа” клуби билан музокараларни бошлаб юборган.
“Динамо” футболчиси “Интер”да?!
Украинанинг “Динамо Киев” клуби ҳимоячиси Виталий Миколенко ўз фаолиятини Миланнинг “Интер” жамоасида давом эттириши мумкин.
Журналист Жанлука Ди Марцио берган маълумотларга суянадиган бўлсак, “Интер” “Челси” футболчиси Эмерсоннинг трансферини амалга ошира олмаса, бор эътиборини 21 ёшли Миколенкога қаратади.
Эслатиб ўтамиз, аввалроқ Виталий билан “Рома” жамоаси қизиқиш билдирган эди. “Динамо” клуби ўз футболчисини 35 миллиондан камига қўйиб юбормоқчи эмас.
“Байер” норози
Леверкузеннинг “Байер” клуби Кай Ҳавертцни қўлга киритиш ниятидаги клубларни огоҳлантирди.
“Bild” нашри журналисти Кристиан Фальканинг маълум қилишича, немис клуби Кайни қўлга киритишни истаган жамоа 28-августдан кеч қолмаслиги лозим. Aкс ҳолда, “Байер” уни трансферга қўйишдан бош тортади.
Манбанинг маълум қилишича, “Байер” шу йўсинда Кайнинг эътиборини келаси мавсумга яхшилаб тайёргарлик кўришга қаратишни режа қилган.
