2020 йилги УЕФА суперкубоги ҳақидаги барча маълумотлар билан таништириб ўтамиз.

Қачон ва қаерда?
УЕФА суперкубоги 24 сентябрь куни Будапешт шаҳридаги "Пушкаш Арена" стадионида бўлиб ўтади. Унда Европа лигаси ғолиби "Севилья" ва Чемпионлар лигаси ғолиби "Бавария" клублари тўқнаш келишади. Учрашув Тошкент вақти билан 00:00да бошланади.

Аввалги йилларда УЕФА суперкубоги Прага (2013), Кардифф (2014), Тбилиси (2015), Тронхейм (2016), Скопье (2017), Таллин (2018) ва Истанбул (2019) шаҳарларида ўтказилган. Унгача эса учрашув доимий равишда Монакода ташкил этилган.

2020 йилги баҳс дастлаб 12 август куни Порту шаҳридаги "Драгау" стадионида ўтказилиши керак эди. Аммо COVID-19 пандемияси туфайли ўйин Будапештга кўчирилди.

Томошабинлар киритиладими?
Ҳозирда УЕФА тасарруфи остидаги барча мусобақалар бўш стадионларда ўтказилмоқда. УЕФА 19 август куни ташкилотга аъзо барча 55 миллий ассоциациялар билан видеоконференция ўтказиб, томошабинларни аста-секин стадионларга қайтариш имкониятини муҳокама қилди. УЕФА суперкубоги учрашувига эса чекланган миқдорда мухлисларнинг киритилиши режалаштирилмоқда.

УЕФА суперкубоги нима?
Иккита еврокубокларнинг ғолиблари ўртасида ўйин ташкил қилиш ғояси нидерландиялик журналист Антон Виткампга тегишли. Чемпионлар кубоги/Чемпионлар лигаси ғолиби доимо унда иштирок этиб келган. Иккинчи иштирокчи сифатида турли йилларда ё Кубок эгалари кубоги (1972-1999), ёки УЕФА кубоги/Европа лигаси (2000-...) ғолиби танланган.

Ким кўп ғолиб чиққан?
2019 йилда УЕФА суперкубогини "Ливерпуль" қўлга киритган. Аммо ЕЧЛ ғолиби ҳамиша ҳам Суперкубокда ғалаба қозонавермаган. Шу пайтгача Суперкубок учун ўтказилган 44та баҳснинг 24тасидагина Чемпионлар кубоги/Чемпионлар лигаси соҳиби ғалаба қозонган. "Барселона" ва "Милан" клублари УЕФА суперкубогини қўлга киритиш бўйича рекордчи ҳисобланишади — 5 мартадан.

Кейинги УЕФА суперкубоги учун баҳслар қаерда ўтказилади?
Кейинга 3 йилда УЕФА суперкубоги учун учрашув қуйидаги шаҳарларда ўтказилиши режалаштирилган: Белфаст (2021), Хельсинки (2022) ва Қозон (2023).