Англиянинг «Ньюкасл» клуби ўзининг расмий сайти орқали, клубни сотиш ишлари муваффақиятсизликка учрагани ҳақида расмий баёнот берди. Клубнинг ҳозирги хўжайини Майк Эшли ушбу масала юзасидан Саудия Арабистони компанияси билан музокара олиб борганди. Томонлар клубни арабларнинг қўлига ўтиши борасида келишувга эришганди, бироқ, Англия Премьер-лигаси раҳбарияти ушбу битимга таъқиқ қўйди.
«Ньюкасл» раҳбарияти АПЛга клубни сотиб олмоқчи бўлган компания Саудия Арабистони ҳукуматига тегишли эмаслигини исботлаб берди. «Ньюкасл» Премьер-лиганинг ижрочи директори Ричард Мастерсга ушбу битим тўлақонли равишда қонуний бўлишига ишонтирди. Бироқ, АПЛ барибир клубнинг сотилишига қаршилик қилди.
Шу тариқа, Эшли «Ньюкасл»нинг хўжайини сифатида қоладиган бўлди. Истеъфога чиқиши мумкинлиги ҳақидаги тарқалган миш-мишларга қарамай, у жамоа бош мураббийи Стив Брюсни қўллаб-қувватлади.
