Stadion.uz Туркия терма жамоасининг собиқ аъзоси Эмре Aшик дуч келган оғир вазият ҳақида фикр алмашади.
Эмре Aшик Туркия терма жамоаси тарихидаги энг совриндор футболчи саналади. Қаҳрамонимиз 2002 йилда бўлиб ўтган Жаҳон чемпионати ва 2008 йилда ташкиллаштирилган Европа биринчилигида бронза медалларига эга чиққан.
Қитъамизда бўлиб ўтган мундиалда иккита учрашувда майдонга тушган марказий ҳимоячи 2008 йилдаги қитъа биринчилигида жамоанинг етакчисига айланган. Унинг клуб миқёсидаги фаолияти ҳам ажойиб. Қаҳрамонимиз турк грандларнинг барчасида тўп сурган. «Бешикташ», «Галатасарай» ва «Фенербаҳче» шарафини ҳимоя қилган ҳимоячи 2010 йилда ўзининг сўнгги учрашувини ўтказади ва бутсаларини михга илади.
Қаҳрамонимиз 8 йил аввал Ягмур исмли модель қизга уйланади. Ушбу жуфтлик 8 йил давомида ширин ҳаёт кечиради ва учта фарзандни дунёга келтиради. Ташқаридан чиройли кўринган оилани Ягмур ичкаридан емириб боради. Собиқ футболчининг турмуш ўртоғи хиёнат кўчасига кириб қолганини пайқаб қолган Эмре судга ажрашиш тўғрисида ариза топширади.
Оила қуруш олдидан тузилган шартномага кўра, Ягмур 46 ёшли футболчидан ҳеч нарса ундира олмаслиги лозим эди. Ягмур ҳеч нарсасиз кўчада қолишни истамайди ва турмуш ўртоғини ўлдириш режасини тузади. Хиёнаткор аёл ўз жазмани Эрди Сунгурга бу вазифани юклатади. Эрди бу вазифани уддалай олмаслигини англагач, 10 миллион лира (1 миллион евро) эвазига қотил йўллашга мажбур бўлади. Эътиборлиси шундаки, Ягмур ва Эрди қотилга пул ва тўппончани топшириб Эмренинг кун тартибини ҳам қоғозга кўчириб беради. Бундан аввал уч инсонни ўлдиришда айбланган жиноятчи катта пуллар эвазига бу таклифга рози бўлади.
Ҳаммаси Ягмурнинг режаси асосида кетаётган эди, бироқ кутилмаганда исми ошкор қилинмаган жиноятчи ўз фикридан қайтади ва воқеани Эмре Aшикнинг ўзига маълум қилади.
Собиқ футболчи дарров қонун орқали ўзини ҳимоя қилишга қарор қилади. Орадан кўп ўтмай унинг турмуш ўртоғи ва Эрди Сунгур ҳуқуқни ҳимоя қилиш органлари томонидан қўлга олинади.
Барчаси ойдинлашгач, биринчи бўлиб Эрди воқеага изоҳ беришга қарор қилди:
«Мен ва Ягмур хиёнат кўчасига кириб қолдик. У Эмренинг барча пуллари ва меросини қўлга киритиш ниятида эди. Шу сабабли, менга уни ўлдиришим лозимлиги айтди. Кўп ўтмай у менга тўппонча олиб келди ва гўшт бўлагига ўқ узишимни айтди. Очиғи бу иш қўлимдан келмади. Бундан унинг жаҳли чиқди.»,-деб иқтибос келтирмоқда Hurriyet Daily News нашри.
Aйни дамда, иш судга оширилган ва Ягмур ва Эрдига қасддан одам ўлдириш айби қўйилмоқда.
Маълумот ўрнида айтиб ўтиш жоиз, Эмре Aшик футболчилик фаолиятини якунлагач, ўзини қурилиш бизнесига урган. У айни дамда, Туркиядаги катта қурилиш компанияларидан бирининг эгаси саналади.
