Суперлиганинг 18-тур доирасида бўлиб ўтган "Сурхон" ҳамда АГМК жамоалари ўртасидаги учрашувдан сўнг, меҳмонлар бош мураббийи Миржалол Қосимов ўз фикри билан ўртоқлашди.
"Қизиқарли ва шиддатли ўйин бўлди. "Сурхон" жамоасига қарши ўйин осон ўтмаслигини билардик. Уларнинг мусобақа жадвалидаги эгаллаб турган ўрни ҳам ҳар бир ўйинда очко учун курашишга ундамоқда. Шунингдек, жамоа таркибида маҳоратли футболчилар жамланган. Шу боисдан ҳам мазкур баҳс қийин бўлиши аниқ эди. Тезкор урилган гол жамоамизга ёрдам берди. Иккинчи бўлимда жамоалар ҳужумкор ва очиқ футбол намойиш этишди. Термиздан муҳим ғалаба билан қайтаётганимиздан хурсандман. Ушбу ғалабани жамоамиз мухлисларига бағишлаймиз".
