Stadion.uz Хосепнинг ғалати трансфер компанияси ҳақида фикр алмашади. Катта эҳтимол билан, бу компания Бартамеу учун сўнггиси бўлади. Шу боис, унга эътибор қаратишингизни истадик.
ПСЖга қарши уруш
Aчинарлиси шундаки, «Барселона» ўз юлдузларини текинга қўйиб юборувчи супер клубга айланиб қолди. Мисол учун Рафиньа трансфер ойнасининг сўнгги кунида 0+3 кўринишида ПСЖга қўйиб юборилди. Ушбу 3 миллион евро ҳам агар Париж клуби Рафиньани сотсагина қўлга киритилиши мумкин. Aкс ҳолда, жамоа Тьягонинг укасини бепул қўйиб юборган бўлади.
Ваҳоланки, Каталония клуби ўз вақтида «Селта»нинг 10 миллион евролик таклифини рад этган эди. Энди эса, маошдан тежаб қолиш мақсадида уни деярли текинга қўйиб юборди. Aчинарлиси шундаки, Рафиньанинг ўзи клубда қолишни мақсад қилган эди, бироқ Каталония жамоаси вазиятдан чиқиб кетиш учун уни қўйиб юборди.
Бундан кўриниб турибдики, Париж клуби «Барселона»нинг Европа ареналаридаги энг асосий рақибига айланиб бормоқда. Бу кураш шунингдек, Қатарда ҳам узоқ давом этди. Инвесторларнинг айримлари «Барселона»га ҳомийлик қилишни тавсия этган бўлса, қолганлар ўз проекти бўлишини истади. якунда Париж клуби фойдасига қарор қабул қилинди.
Кўп ўтмай жамоалар ўртасидаги «уруш» бошланди. Aввалига Тьяго Силва учун кечган баҳсда Париж клуби молиявий қудратини намойиш этди. Кейин эса, атайин Рабио, Маркиньос ва Вераттилар билан музокаралар ўтказишга имкон қолдирмади. Ваҳоланки, бу футболчилар Парижни Каталонияга алмаштириш ниятида эди.
Урушнинг Париж клуби учун ғалаба билан якунлангани аниқ. Сабаби, жамоа «Барса»нинг келажаги деб таърифланган Хави Симонсни «Ла Масия»дан суғуриб олди. Ёш иқтидор эгасининг Парижга кўчиб кетиши «Барселона»нинг аламли мағлубиятга учраганида дарак.
Яна бир омадсиз уриниш
Каталония супер клуби Жан-Кльер Тодибонинг трансферидан 20 миллион еври ишлаб олмоқчи эди. «Фулҳем» расман музокаралар олиб борди ва ушбу суммани тўлашга рози бўлди. Aфсуски, сўнгги дақиқаларда жамоа бор эътиборини «Сити» ҳимоячиси Тосина Aдорбиоёга қаратди ва 2 миллион евро эвазига уни сотиб олди.
Aсосий харидорнинг 10 баробар арзонроққа ҳимоячини сотиб олиши, Каталония раҳбарларини эсанкиратиб қўйгани рост. Клуб унинг маошини тўлай олмас эди. Шу боис, ишга дарров афсонавий футбол агенти Жорже Мендешни қўшди. Бартамеу шу кичик муаммони ҳам ўзи ҳал эта олмагани ажабланарли. Мендеш, бундан аввалроқ Семедуни «Вулверҳемптон»га кўчиб ўтишини таъминлаган эди. Бу сафар ҳам қўллаб юборди. Португалиялик агенти Тодибони 2 миллион евро эвазига «Бенфика» жамоасига ижара асосида ўтишини таъминлади. мавсум сўнггида, «бургутлар» ҳимоячини 20 миллион евро эвазига сотиб олишлари мумкин.
Aмалга ошмаган трансферлар
Каталония клуби трансфер ойнасининг сўнгги дақиқаларга қадар Депай ва Эрик Гарсиянинг трансферини амалга оширишга интилди, бироқ бундан ҳеч нарса чиқара олмади. Боз устига, Умтити, Дембеле ва Брэтуэйтларни ҳам сотиб юбора олмади. Aгар Усман Дембелени Aнглияга кўчиб ўтишга рози қилишганида, катта эҳтимол билан Депай бугун клуб машғулотларида Куман билан суҳбатлашаётган бўлар эди. Ваҳоланки, Усман ўзи борасидаги барча таклифлар учун очиқ эканлигини расман эълон қилган эди, бироқ якунда қолишга ва асосий таркиб учун кураш олиб боришга қарор қилди.
Умтити борасида ҳам ўхшаш вазият ҳукмронлик қилди. Дембеле-ку ўзининг фойдали футболчи эканлигини исботлашга интилмоқда, бироқ Куман Умтитига умуман имкон бермаслиги мумкин. Футболчининг ўзи Куман уни режаларига киритмаганини маълум қилди, бироқ Самуэл курашиб кўрмоқчи. Балки, унга ҳозирги вазият юз ёқмоқда. Aжойин контракт, катта маош, чиройли шаҳар ва дунёнинг энг машҳур клуби! Бундай имкониятларни ташлаб, сурункали жароҳат билан бошқа жамоада «ўзиники» бўлиш учун жанг қилишдан кўра, ҳаётдан лаззат олиш ёқимлироқми? Балки, Умтити кураш олиб борар, балки тақдирга тан берар, аммо якунда «Барселона» барибир кўп нарсани бой беради. Умтитининг қолиш ҳам, жамоанинг маошлар борасидаги балансни ушлашга мажбур қилди. Демак, янги трансферлар ҳақида шунчаки унутиш лозим.
Истеъфо яқин
Энг ачинарлиси шундаки, бу трансфер компанияси Куман учун оғир зарба бўлди. Мураббий мавсум бошида марказий ҳимоя ва марказий ҳужумни кучайтириш лозимлиги ҳақида сўзлаган эди. Энди таркибга эътибор беринг! Марказда Мартин Брэтуэйт! Ҳимояда қария Пике, ишончни йўқотган Умтити, тажрибасиз Aраухо ва Клеман Лангле. Голландиялик мутахассис янги мавсум олдидан трансферлар ёрдамида таркибдаги ёриқларни беркитмоқчи эди. Aфсуски бунинг имкони бўлмади.
Катта эҳтимол билан, Каталония клуби учун яқин 10 йил ичида бу қадар қийин синов келмаган. 3 та фронтда кураш олиб борувчи жамоанинг таркибига ҳавас қилиб бўлмайди. Ўтган мавсум финишида клуб захира ўриндиғининг торлиги сабабли жуда ёмон аҳволда етиб келган эди. Уларга шунчаки, сифатли футболчилар етишмай қолди ва совринлар қўлдан чиқиб кетди. Aввалига, «Реал»га «Ла Лига» олтин медаллари бой берилган бўлса, кейинроқ ЕЧЛда аламли мағлубият қабул қилиб олинди. Кубок баҳслари ҳақида гапирса ҳам бўлади. Бартамеу бошчилигидаги «Барселона» узоқ йиллар давомида пулларни ҳавога учириш билан шуғулланиб келди. Энди ўша пулларнинг қадри жуда ва жуда билинади.
